12 დეკემბერს, მაშინ, როცა დეპუტატებმა უზენაესი სასამართლოს უვადო მოსამართლეები უნდა აირჩიონ, პარლამენტის პიკეტირება მოხდება. ამის შესახებ ოპოზციის შეხვედრის დასრულების შემდეგ ევროპული საქართველოს ლიდერმა, გიგი უგულავამ თქვა.

"ჩვენ მივიღეთ გადაწყვეტილება, რომ ჩვენი ერთობის რამდენიმე დეპუტატმა შიგნიდანაც მოახერხოს, რომ ეს პროცესი რამენაირად შეჩერდეს", — თქვა გიგი უგულავამ.

პარლამენტის უპარტიო დეპუტატი ეკა ბესელია ამბობს, რომ ამ კენჭისყრის დროს საზოგადოება მობილიზებული უნდა იყოს და პარლამენტთან შეიკრიბოს.

ეს პირველი შემთხვევა არ იქნება, როცა პარლამენტის პიკეტირება მოხდება. წინა ორ შემთხვევაში პიკეტი სპეცრაზმმა წყლის ჭავლის გამოყენებით დაშალა.

ნოემბრის მოვლენები — მოკლედ

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.