სახალხო დამცველი, ნინო ლომჯარია აჭარის მაუწყებლის საინფორმაციო სამსახურის ჟურნალისტებსა და დირექტორს შეხვდა. ჟურნალისტებმა ისაუბრეს საფრთხეზე, რომელიც სარედაქციო დამოუკიდებლობას ეხება.

ლომჯარიამ განაცხადა, რომ იგი სრულად უჭერს მხარს ჟურნალისტთა საქმიანობასა და სარედაქციო დამოუკიდებლობაში ჩაურევლობის პოლიტიკას და ყურადღებით დააკვირდება ტელევიზიაში მიმდინარე მოვლენებს.

"ჟურნალისტთა საქმიანობაში ჩარევა, მით უმეტეს იმ ხერხებითა და იმ ფორმებით, რაც ჩემთვის გახდა ცნობილი, მიუღებელია და ეს მოვლენები არაჯანსაღ გარემოს ქმნის ტელევიზიაში", — განაცხადა ნინო ლომჯარიამ შეხვედრის შემდეგ.

მაუწყებლობის დირექტორთან, გიორგი კოხრეიძესთან შეხვედრის შემდეგ სახალხო დამცველმა განაცხადა, რომ არსებული კონფლიქტური სიტუაცია ორივე მხარეს უქმნის სირთულეს. სახალხო დამცველმა გიორგი კოხრეიძეს ურჩია მაქსიმალურად შეიკავოს თავი ჟურნალისტების მისამართით შენიშვნებისა და მითითებებისაგან და ძირითადი ყურადღება საორგანიზაციო და მენეჯმენტის საქმიანობაზე გაამახვილოს. ასევე, მას მართებულად მიაჩნია აუდიტის მოწვევა და ექსპერტთა ჩართულობით ორგანიზაციის ფინანსური შემოწმება.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

წინა დირექტორის მოადგილე, დირექტორის მოვალეობის ყოფილი შემსრულებელი და ამჟამადაც დირექტორის მოადგილე ნათია ზოიძე კი აცხადებს, რომ კოხრეიძე სარედაქციო პოლიტიკისგან ჩამოშორებისკენ მოუწოდებს ან სისხლის სამართლებრივი დევნით ემუქრება.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტანტმა ზვიად ქორიძემ და მედიამენეჯერმა, მარინა ვაშაყმაძემ.

ნათია კაპანაძის იმპიჩმენტის შემდეგ აჭარის ტელევიზიამ დირექტორის არჩევა 8 თვის განმავლობაში 3 კონკურსზე ვერ შეძლო. კოხრეიძე კი 22 ნოემბერს ქართული ოცნების უმრავლესობით დაკომპლექტებულმა ახალმა მრჩეველთა საბჭომ აირჩია.