დირექტორად დანიშვნიდან 2 კვირაში, აჭარის ტელევიზიის თანამშრომლები გიორგი კოხრეიძის წინააღმდეგ აქციას მართავენ. ისინი მოუწოდებენ კოხრეიძეს, რომ შეეშვას დაუსაბუთებელ ბრალდებებს, თვალთვალს, შანტაჟსა და თანამშრომლებზე თავდასხმას.

"მე ვარ ჟურნალისტი, არა — მსახიობი", "ვმუშაობ საზოგადოებისთვის და — არა დირექტორისთვის", "იკითხე ჩვენი სტატიები და არა მიმოწერა" — ამ და სხვა მესიჯებით მიმართავენ თანამშრომლები დირექტორს, რომელმაც ისინი სპექტაკლების დადგმაში დაადანაშაულა.

ჟურნალისტების თქმით, შეხვედრაზე დირექტორმა მათ განუცხადა, რომ საერთაშორიო კვლევები, რომლის მიხედვითაც აჭარის ტელევიზია დაბალანსებული მედიაა, მისთვის სანდო არ არის და სინამდვილეში ისინი პარტიული დღის წესრიგით მუშაობენ. გარდა ამისა, მათივე თქმით, კოხრეიძე მათ წინააღმდეგ იყენებს სხვადასხვა ჭორებსა და ჩანაწერებით ემუქრება.

On.ge-მ სცადა კოხრეიძისთვის ეკითხა, რას ფიქრობს თანამშრომლების პროტესტზე, თუმცა მან გვიპასუხა, რომ აქციაზე არ იცის და ამ საკითხზე კომენტარს არ აკეთებს.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

წინა დირექტორის მოადგილე, დირექტორის მოვალეობის ყოფილი შემსრულებელი და ამჟამადაც დირექტორის მოადგილე ნათია ზოიძე კი აცხადებს, რომ კოხრეიძე სარედაქციო პოლიტიკისგან ჩამოშორებისკენ მოუწოდებს ან სისხლის სამართლებრივი დევნით ემუქრება.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტატმა ზვიად ქორიძემ და მედიამენეჯერმა, მარინა ვაშაყმაძემ.

შეგახსენებთ, რომ ნათია კაპანაძის იმპიჩმენტის შემდეგ აჭარის ტელევიზიამ დირექტორის არჩევა 8 თვის განმავლობაში 3 კონკურსზე ვერ შეძლო. კოხრეიძე კი 22 ნოემბერს ქართული ოცნების უმრავლესობით დაკომპლექტებულმა ახალმა მრჩეველთა საბჭომ აირჩია.