საქართველოს ექს-პრეზიდენტი მიხეილ სააკაშვილი ქუთაისში ნაციონალური მოძრაობის წინააღმდეგ მიმდინარე აქციებს გამოეხმაურა და განაცხადა, რომ გადაწყვეტილება მიიღო და გადადგა.

"ნამდვილმა მშრომელებმა, კარგმა ხალხმა მომიწოდა ქუთაისში. იყო მასობრივი გამოსვლა ხალხის, იყო კარგი პურის მჭამელების, კარგი დამრტყმელების, კარგი ჯიგარი წამლის "გამრჭობების", კარგი ბიუჯეტის მჭამელების, კარგი მუმიების გამოსვლა იყო. მათ მომიწოდეს და მივიღე გადაწყვეტილება ამ წარსულის მუმიების თხოვნით და გადავდექი", — განაცხადა სააკაშვილმა გადაცემა მთავარ აქცენტებში.

ორი დღეა ქუთაისში ნაციონალური მოძრაობის წინააღმდეგ საპროტესტო აქციებს მართავენ. "დემიშიზაცია ქუთაისიდან იწყება" — ამ წარწერის მქონე ბანერით დღეს, პირველ დეკემბერს ქართული ოცნების მხარდამჭერებმა ქალაქში მსვლელობა მოაწყვეს. აქტივისტებმა ოპოზიციური პარტიის ოფისს კვერცხები და საღებავი ესროლეს. გუშინდელ აქციაზე კი მათ ოფისს ცოცხები და კვერცხები დაუშინეს.

არა ნაცებს! — ამ შინაარსით აქცია გაიმართა თბილისში, ვერის ბაღში. შეკრების მიზეზად მათ ოპოზიციის პროტესტის ფორმები დაასახელეს.

ნაციონალური მოძრაობის თავმჯდომარე, გრიგოლ ვაშაძე აცხადებს, რომ ქუთაისში მათ ოფისთან ქართულმა ოცნებამ სახელმწიფო მოხელეები მიიყვანა და აქციას ატარებინებს:

"ყველანაირად ცდილობენ, რომ გვიბიძგონ არაცივილიზებული მოქმედებისკენ. ვერ მოგართვით. არავითარი სამოქალაქო დაპირისპირება არ იქნება".

გარდა ამისა, ევროპული საქართველოს დეპუტატის, გიგა ბოკერიას შეფასებით, გვიან ღამით ნაციონალური მოძრაობის ოფისისთვის კვრცხებისა და ცოცხების სროლა აგონიაზე მეტყველებს.