გირჩის ლიდერი ზურა ჯაფარიძე ამბობს, რომ პარტიის მიერ ბიძინა ივანიშვილის ხატებით პერფორმანსის მიზანი იყო ეჩვენებინათ პარტიის წევრთა მონური მორჩილება. ჯაფარიძე TV პირველის ეთერში აღნიშნავს, რომ ქართული ოცნების დეპუტატების განცხადებები იაფფასიანი მცდელობაა იმისა, რომ ადამიანების ნაწილი "რაღაც რელიგიურ გრძნობებზე ააგდოს".

"სად ნახეს ხატები? ფოტოშოპში აწყობილი ნახატი ხატია? ეგეთ ხატებთან ლოცულობს ეგ ხალხი?.. იდეაში, რაზე ჩხუბობენ? ამბობენ, მაგ კაცმა ააშენა სამებაო და ერთი ხატი კი ეკუთვნის", — თქვა ჯაფარიძემ.

25 ნოემბერს პარტია გირჩის მხარდამჭერებმა ბიძინა ივანიშვილის ბიზნეს რეზიდენციისკენ საპროტესტო მსვლელობა მოაწყვეს, "წმინდა ბიძინას" ხატებით.

პერფორმანსი დაიწუნეს ქართული ოცნების დეპუტატებმა - ირაკლი კობახიძემ, ზაზა გაბუნიამ და ნუკრი ქანთარიამ.

კობახიძემ განცხადება ფეისბუქის პირად გვერდზე გაავრცელა, მან პერფორმანსი ხატთმებრძოლეობას შეადარა.

ნუკრი ქანთარიამ კი განაცხადა, რომ ღმერთს შესთხოვს აქციის მონაწილეებს სასჯელი არ მოუვლინოს.

ზაზა გაბუნიამ კი ათეისტური ფანატიზმი და ნაბიჯი ჩეკისტობამდე უწოდა.