მთავარი არხის ინფორმაციით, კუსტარულად დამონტაჟებული გამათბობლის გამო სახელმწიფო უსაფრთხოების სამსახურის მაღალჩინოსანმა, ელდარ ეგრისელაშვილმა მეზობლებს ფიზიკური და სიტყვიერი შეურაცხყოფა მიაყენა. ერთ-ერთი დაზარალებული საავადმყოფოშია გადაყვანილი.

დაზარალებულის ოჯახის წევრები აცხადებენ, რომ ეგრისელაშვილმა მათი გამათბობელი მოხსნა, რის გამოც მათ სახლში, სადაც ბავშვები იმყოფებოდნენ CO გროვდებოდა. მათი თქმით, როცა ამის მიზეზი ჰკითხეს, ეგრისელაშვილმა და მისმა ძმამ ჩხუბი დაიწყეს.

"ჯერ ჩემი სიმამრი სცემეს, მერე მე. შეგვაგინეს და მიგვაფურთხეს კიდეც. ჩემს სიმამრს სახეში სილაც გაარტყეს და წიხლები ურტყეს... ელდარი დამემუქრა, რომ აქ ცხოვრებას ვერ შევძლებდი. აშკარად ნასვამები იყვნენ", — აცხადებს დაზარალებულის ოჯახის წევრი. (მისი კომენტარის თარგმანს მთავარი ავრცელებს)

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. უწყებაში მომხდარზე სხვა კომენტარს არ აკეთებენ. ამ საკითხზე კომენტარს On.ge სუს-იდანაც ელოდება.

განახლება: სუს უარყოფს, რომ ელდარ ეგრისელაშვილი მათი თანამშრომელია. უწყებაში არ პასუხობენ კითხვას, მუშაობდა თუ არა ეგრისელაშვილი უწყებაში ადრე.