სახელმწიფო უსაფრთხოების სამსახური უარყოფს ინფორმაციას იმის შესახებ, რომ მარნეულის ინციდენტში მონაწილე ელდარ ეგრისელაშვილი მათი თანამშრომელია. უწყებაში არ პასუხობენ კითხვას, მუშაობდა თუ არა ეგრისელაშვილი სუს-ში ადრე.

მთავარი არხის ინფორმაციით, კუსტარულად დამონტაჟებული გამათბობლის გამო ელდარ ეგრისელაშვილმა მეზობლებს ფიზიკური და სიტყვიერი შეურაცხყოფა მიაყენა. ტელეკომპანიასთან საუბრისას დაზარალებულის ოჯახის წევრები აცხადებდნენ, რომ ეგრისელაშვილი სუს-ის თანამშრომელია.

"ჯერ ჩემი სიმამრი სცემეს, მერე მე. შეგვაგინეს და მიგვაფურთხეს კიდეც. ჩემს სიმამრს სახეში სილაც გაარტყეს და წიხლები ურტყეს... ელდარი დამემუქრა, რომ აქ ცხოვრებას ვერ შევძლებდი. აშკარად ნასვამები იყვნენ", — აცხადებს ერთ-ერთი დაზარალებული.

ოჯახის წევრების თქმით, ეგრისელაშვილმა მათი გამათბობელი თვითნებურად მოხსნა, რის გამოც სახლში, სადაც ბავშვები იმყოფებოდნენ CO გროვდებოდა. მათიბრ თქმით, როცა ამის მიზეზი ჰკითხეს, ეგრისელაშვილმა და მისმა ძმამ ჩხუბი დაიწყეს. ერთ-ერთი დაზარალებული საავადმყოფოშია გადაყვანილი.

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. უწყებაში მომხდარზე სხვა კომენტარს არ აკეთებენ.