პრემიერმინისტრ გიორგი კვირიკაშვილის მოსაზრებით, საზოგადოებაში მიმდინარეობას "არაჯანსაღი, ხელოვნური სპეკულაციები" ქართული ოცნების მიერ საკონსტიტუციო უმრავლესობის მოპოვების შესაძლებლობასთან დაკავშირებით. ამის შესახებ კვირიკაშვილმა დღეს, მთავრობის სხდომაზე ისაუბრა:

"ეს აბსოლუტურად არაჯანსაღი სპეკულაციაა, რომ დაიღუპა ქვეყანა დღეს, რადგან ქართული ოცნება იმარჯვებს საკონსტიტუციო უმრავლესობით. ეს არის ძალიან ხელოვნური. ჩვენ მემკვიდრეობად მივიღეთ ძალიან დაუბალანსებელი კონსტიტუცია და აუცილებლად შესაქმნელია ჯგუფი, რომელიც საზოგადოების თითოეული წევრის ძალიან ფართო ჩართულობით მოახდენს ისეთ ცვლილებებს, რომ მომავალში ვერავინ ვერასოდეს ვერ მოახდინოს ძალაუფლების კონცენტრირება, უზურპირება და ეს იყოს ერთხელ და სამუდამოდ ნამდვილად დემოკრატიული ევროპული საქართველოს კონსტიტუცია. მაგრამ ეს არ ნიშნავს, რომ ეს იქნება პირველი საკითხი, რომელსაც პარლამენტში დავეტაკებით და განვიხილავთ".

კვირიკაშვილის შეფასებით, 8 ოქტომბერს საქართველოში ჩატარდა უპრეცენდენტოდ თავისუფალი და გამჭვირვალე საპარლამენტო არჩევნები. მან ამომრჩეველს საპარლამენტო არჩევნების მეორე ტურში აქტიურობისკენ მოუწოდა. მეორე ტური საქართველოს 50 მაჟორიტარულ ოლქში 30 ოქტომბერს იმართება.