"გავრილოვის ღამიდან" უკვე ხუთი თვე გავიდა. შინაგან საქმეთა სამინისტრო ამ დრომდე მალავს, რამდენი რეზინის ტყვია და ცრემლსადენი გაზი გამოიყენა აქციის დასაშლელად, რა დროსაც რამდენიმე ათეული მოქალაქე დაშავდა, ორმა კი თვალი დაკარგა.

ამ ინფორმაციის მისაღებად On.ge-მ შინაგან საქმეთა სამინისტროს მიმართა, თუმცა უწყებამ პასუხი საერთოდ არ გასცა. რამდენიმე დღის წინ კი სახალხო დამცველის აპარატიდან მიღებული საჯარო ინფორმაციით გაირკვა, რომ უწყებამ ამ ინფორმაციას გრიფით საიდუმლო დაადო.

მათივე მოწოდებული ინფორმაციიდან ირკვევა, რომ 20 ივნისის აქცია სამი სახეობის ტყვიით დაშალეს.

20 ივნისს რამდენიმე ათეულმა ათასმა ადამიანმა თბილისში რუსი დეპუტატის ჩამოსვლა და საქართველოს პარლამენტის შენობაში, პარლამენტის თავმჯდომარის სკამზე დაჯდომა გააპროტესტა. აქცია სპეცრაზმმა გაფრთხილების გარეშე გვიან ღამით ძალის გადამეტებით დაშალა. ამ დროს დაშავდა ათეულობით მოქალაქე, მათ შორის ორმა დაკარგა თვალი.