18 ნოემბერს აქციის დაშლის დაშლის დროს დაკავებულების სამართალდარღვევის ამსახველი სამხრე კამერა პოლიციის თანამშრომელმა სამსახურში დატოვა. ეს დღევანდელ სასამართლო სხდომაზე გაირკვა.

პოლიციელმა, რომელიც საქმის მთავარი მოწმეა, "არ იცის" ამოიცნობს თუ არა თავის თავს იმ კადრებში, რომელიც სხდომაზე მტკიცებულებად არის წარდგენილი.

მოსამართლემ კითხვაზე, სად იდგა პოლიციელი, გზის სავალ ნაწილზე, თუ ტროტუარზე, ასეთი პასუხი მიიღო: "არ ვიცი, სად მახსოვს, იქ ვიქნებოდი, აბა, სად ვიქნებოდი".

დღევანდელ სხდომაზე გაირკვა ისიც, რომ პოლიციელი, რომელიც ამტკიცებს, რომ 18 ნოემბერს დაკავებულებმა სამართალდარღვევა ჩაიდინეს, მტკიცებულებად მიტანილი ვიდეომასალა თვითონაც არ უნახავს.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.