საქართველოს პროკურატურამ ამირან (ბუტა) რობაქიძისა და მასთან ერთად ავტომანქანაში მყოფი პირების მიმართ უფლებამოსილების ბოროტად გამოყენების საქმეზე ირაკლი ოქრუაშვილისთვის და ზურა ადეიშვილისთვის ბრალის წაყენება გადაწყვიტა. ინფორმაციას პროკურატურა ავრცელებს.

მაშინ ირაკლი ოქრუაშვილი შინაგან საქმეთა მინისტრი იყო, ზურა ადეიშვილი — მთავარი პროკურორი.

ადეიშვილისა და ოქრუაშვილის მიმართ გამოტანილია ბრალდების შესახებ დადგენილება სისხლის სამართლის კოდექსის 332-ე მუხლის მესამე ნაწილის "გ" ქვეპუნქტით (2006 წლის 31 მაისამდე მოქმედი რედაქცია). ამ მუხლით სასჯელის სახედ გათვალისწინებულია თავისუფლების აღკვეთას სამიდან რვა წლამდე ვადით.

პროკურატურის ვერსია

2004 წლის 24 ნოემბერს, დაახლოებით, ღამის 2 საათზე თბილისში, წერეთლის გამზირზე პოლიციამ გააჩერა BMW-ს მარკის მანქანა, რომელშიც მძღოლი და ხუთი მგზავრი იჯდა. პირადი შემოწმებისას პატრულ-ინსპექტორ გ.ბ.-ს შემთხვევით გაუვარდა ტყვია ტაბელური ცეცხლსასროლი იარაღიდან და მარცხენა იღლიის არეში მძიმედ დაჭრა ავტომანქანიდან გადასული მგზავრი ამირან რობაქიძე, რომელიც შემთხვევის ადგილზევე გარდაიცვალა.

უწყება აცხადებს, რომ ამ ფაქტის წინაშე ინფორმირებული იყო ირაკლი ოქრუაშვილი, რომელმაც შს მაღალჩინოსანი დაავალა "გადაერჩინათ საპატრულო პოლიციის იმიჯი" და "აღნიშნული ფაქტისთვის მიეცათ შეიარაღებულ დაჯგუფების მიერ პოლიციელებზე თავდასხმის სახე".

"ირაკლი ოქრუაშვილის მიერ გაცემული დავალების შესაბამისად, შს სამინისტროს მაღალჩინოსნებმა გარდაცვლილ ამირან (ბუტა) რობაქიძეს და მასთან ერთად მანქანაში მსხდომ პირებს ჩაუდეს ცეცხლსასროლი იარაღები და საბრძოლო მასალა, რის შემდეგაც საქართველოს იმჟამინდელი გენერალური პროკურორის ზურაბ ადეიშვილის დავალებით, გამოძიება წარიმართა სამართლებრივად არასწორი მიმართულებით, რაც გამოიხატა გაყალბებული მტკიცებულებების საპროცესო წესით დამაგრებასა და შს სამინისტროს მაღალჩინოსნების მიერ შემუშავებული ვერსიის გამყარებაში", — ვკითხულობთ განცხადებაში.

პროკურატურის განმარტებით, უკანონოდ ბრალი წაუყენეს ხუთ ადამიანს სისხლის სამართლის კოდექსის 353-მუხლის მეორე ნაწილითა და 236-ე მუხლის პირველი და მეორე ნაწილებით.