მესტიის მუნიციპალიტეტის სოფელ ცხუმარის მახლობლად, ტყეში გაჩენილი ხანძრის ლოკალიზება ამ დრომდე მიმდინარეობს. ცეცხლი ტყის ქვედა საფარს 18 ნოემბერს ღამით გაუჩნდა.

როგორც საგანგებო სიტუაციების მართვის სამსახურში აცხადებენ, დილიდან ხანძრის ქრობის პროცესში 90-მდე მეხანძრე მაშველი ჩაერთო. ამ დროისთვის ხანძრის დასახლებულ ტერიტორიაზე გავრცელების საფრთხე არ არსებობს. მომხდარის შედეგად არავინ დაშავებულა.

ხანძრის სალოკალიზაციო სამუშაოებში სულ 140-მდე მეხანძრე-მაშველი იღებს მონაწილეობას. მობილიზებულია შესაბამისი ტექნიკა. ადგილზე, ასევე, მუშაობს რეგიონული სატყეო სააგენტოს 30-მდე თანამშრომელი.