დღეს, 18 ნოემბერს საქართველოს ექვს ქალაქში სხვადასხვა სამედიცინო დაწერებულების ექიმების სოლიდარობის აქციები გაიმართა. ისინი ოკუპანტების მიერ დაკავებულ ვაჟა გაფრინდაშვილს სოლიდარობას უცხადებენ და მოითხოვენ მის დაუყოვნებლივ გათავისუფლებას.

სამედიცინო სფეროს წარმომადგენლები შეიკრიბნენ თბილისში, რესპუბლიკურ საავადმყოფოსთან, მათ ცხინვალელ კოლეგებს ოსურ ენაზე მიმართეს მხარდაჭერისა და სოლიდარობისთვის.

აქცია გამართეს მედი კლაბ ჯორჯიას ექიმებმაც. ისინი კლინიკის წინ გამოვიდნენ ბანერებით, რომლებზეც ეწერა: "თავისუფლება ვაჟა გაფრინდაშვილს", "ექიმები საზღვრებს გარეშე".

ექიმები შეიკრიბნენ ბათუმის ერთ-ერთ სკვერშიც და მათაც მიმართეს კოლეგებს მავთულხლართებს მიღმა. ბათუმში გამართულ აქციაზე აჭარის ტელევიზია წერს.

"სოლიდარობას ვუცხადებთ ვაჟა გაფრინდაშვილს და ყველა იმ ადამიანს, რომელიც უკანონოდ არის დაკავებული საკუთარი ქვეყნის ტერიტორიაზე. განსაკუთრებით ეს მესიჯი ეხება ჩვენს კოლეგებს, მავთულხლართების მიღმა. ჩვენ თქვენი სოლიდარობის იმედი გვაქვს, გთხოვთ მხარი დაუჭიროთ ჩვენს კოლეგას", — განაცხადა აქციაზე მყოფმა ტრავმატოლოგ-ორთოპედმა, ლევან გვასალიამ.

გაფრინდაშვილს საოკუპაციო რეჟიმმა ე.წ. საზღვრის კვეთის ბრალდებით ორთვიანი პატიმრობა შეუფარდა. დე ფაქტო რეჟიმის საინფორმაციო სააგენტო რესის ინფორმაციით, საქმეზე საბოლოო გადაწყვეტილება არ დამდგარა და გამოძიება გრძელდება.

9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს.

ამავე თემაზე: