ამერიკის შეერთებული შტატების საელჩო დე ფაქტო ხელისუფლებას ოკუპირებულ ცხინვალში დაკავებული ექიმის, ვაჟა გაფრინდაშვილის დაუყოვნებლივ გათავისუფლებისკენ მოუწოდებს. საელჩო, ასევე, მოუწოდებს გაიხსნას დაკეტილი გადასასვლელი პუნქტები:

"ჩვენ ისევ და ისევ მოვუწოდებთ რუსეთს, შეასრულოს 2008 წლის ცეცხლის შეწყვეტის შეთანხმება, მათ შორის, გაიყვანოს ძალები კონფლიქტამდე არსებული პოზიციებიდან, უზრუნველყოს ამ რეგიონებში ჰუმანიტარული დახმარების თავისუფალი წვდომა და საქართველოს რეგიონების: აფხაზეთისა და ცხინვალის დამოუკიდებელ სახელმწიფოებად ცნობის გაუქმება".

ქართველ ექიმს, ვაჟა გაფრინდაშვილს საოკუპაციო რეჟიმმა ე.წ. საზღვრის კვეთის ბრალდებით ორთვიანი პატიმრობა შეუფარდა. დე-ფაქტო რეჟიმის საინფორმაციო სააგენტო რესის ინფორმაციით, საქმეზე საბოლოო გადაწყვეტილება არ დამდგარა და გამოძიება გრძელდება.

მათივე ინფორმაციით, 9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს. დე-ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს.

ვაჟა გაფრინდაშვილის ოჯახის წევრები ვარაუდობდნენ, რომ ექიმი ოკუპირებულ ტერიტორიაზეა ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. მათი აზრით, ექიმი სწორედ მაშინ დააკავეს.