საქართველოს პრეზიდენტი სალომე ზურაბიშვილი ამ დრომდე არ გამოხმაურებია ქვეყანაში მიმდინარე მოვლენებს. საზოგადოებისთვის უცნობია, რას ფიქრობს ბოლო არჩეული პრეზიდენტი პროპორციული საარჩევნო სისტემის კანონპროექტის ჩაგდებასა და ოპოზიციის ერთობლივ პროტესტზე. ასევე, პრეზიდენტს არ დაუფიქსირებია პოზიცია ვადამდელი საპარლამენტო არჩევნების დანიშვნის მოთხოვნაზე.

პრეზიდენტის გარდა, მომხდარს გამოეხმაურა ყველა ქართველი პოლიტიკოსი, მათ შორის ქართული ოცნების თავმჯდომარე ბიძინა ივანიშვილიც, რომელიც მედიასთან ძალიან იშვიათად ურთიერთობს. მომხდარი შეაფასა ამერიკის საელჩომ, ევროკავშირის ელჩმა და ამერიკელმა კონგრესმენმაც.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. კანონპროექტის მისაღებად 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.