მემარცხენე აქტივისტები გრიგოლ გეგელია, ირაკლი კუპრაძე და ჯოზეფ ალექსანდერ სმიტი თიბისი ბანკის დამფუძნებლისა და ბიზნესმენის, მამუკა ხაზარაძის მოძრაობა ლელოს შეუერთდნენ. ინფორმაცია ამის შესახებ ნეტგაზეთმა და პუბლიკამ გაავრეცელეს.

ლელოს პრესსამსახურში განაცხადეს, რომ მოძრაობას არამხოლოდ ეს აქტივისტები, არამედ მათი თანამებრძოლებიც უერთდებიან. ვინ იქნებიან ლელოს წევრები დღევანდელ შეხვედრაზე გახდება ცნობილი, როდესაც მამუკა ხაზარაძე ახალ თორმეტეულს წარადგენს.

პუბლიკასთან საუბრისას გეგელია აცხადებს, რომ არსებობს განსხვავებული ხედვები, თუმცა ეს განსხვავებულობა არ აღემატება იმ პატრიოტულ მიზანს, რასაც საკუთარი ქვეყნის ჭაობიდან ამოყვანა და ორპარტიული ტყვეობიდან დახსნა ჰქვია.

On.ge ცდილობს აქტივისტებთან დაკავშირებას. მათ პასუხებს კითხვებზე, რა იდეოლოგიური თანხვედრა აქვთ ბანკირთან და მის მოძრაობასთან მიღებისთანავე შემოგთავაზებთ.

შეგახსენებთ, რომ ხაზარაძე პარტია ლელოს დაფუძნებას 12 დეკემბერს გეგმავს. საზოგადოებრივი მოძრაობის დაფუძნება მან 9 ივლისს დააანონსა, 12 სექტემბერს კი ანაკლიაში პრეზენტაცია გამართა და პირველი თორმეტეული წარადგინა.