ქართული ოცნების ერთ-ერთი ლიდერი, ირაკლი კობახიძე ამბობს, რომ უმრავლესობიდან წასულ 8 დეპუტატთან კონსულტაციები გაიმართება. ამის შესახებ მან პარლამენტში ჟურნალისტებთან განაცხადა.

კობახიძე იმედს გამოთქვამს, რომ ეს კონსულტაციები წარმატებული იქნება.

"ეს დეპუტატები ჩემთვის პირადად არიან კოლეგები, ასევე, მეგობრები. გავაგრძელებთ საუბარს და ვიტოვებ იმედს, რომ [მათი დაბრუნება] იქნება შესაძლებელი... ვეცდებით, დავარწმუნოთ ისინი, რომ მათი დაბრუნება სჭირდება საქმეს, იმ საქმეს, რომელიც წაადგება ქვეყანას", — თქვა კობახიძემ.

ქართული ოცნების მიერ პროპორციულ სისტემაზე გადასვლის კანონპროექტის ჩაგდების შემდეგ გუნდი, საპარლამენტო უმრავლესობა და თანამდებობები 8 დეპუტატმა დატოვა, მათ შორის თამარ ჩუგოშვილმა, თამარ ხულორდავამ და მარიამ ჯაშმა.