31 წლის დავით ფარადაშვილმა 20 ივნისის ღამეს თავში დაზიანება მიიღო. მთავარი არხის ინფორმაციით, თავში ცრემლსადენი გაზის შაშხანის მოხვედრის გამო მას თავისქალის ნაწილი აღარ აქვს და ახლა იმპლანტაცია ესაჭიროება. ამასთანავე, დარღვეული კოორდინაციის გამოსასწორებლად ფარადაშვილი ოთხი თვეა რეაბილიტაციას გადის.

დავით ფარადაშვილი მთავართან ამბობს, რომ მას ამ დრომდე დაზარალებულის სტატუსი არ აქვს:

"ძალიან დიდი ფსიქოლოგიური სტრესი გადავიტანე ოთხი თვის განმავლობაში. ოთხი თვეა კლინიკაში, სარეაბილიტაციო ცენტრში და რეანიმაციაში ვარ. ასე მგონია, სხვისი ცხოვრებით ვცხოვრობ".

ფარადაშვილი ამბობს, რომ 20 ივნისის ღამეს ტელევიზორს უყურებდა და აქციაზე თანამოაზრეებთან მივიდა. ის იხსენებს იმ მომენტს, როცა შაშხანა მოხვდა:

"ჩოჩქოლი ატყდა და მარცხენა მხრიდან მომხვდა. გავიხედე თვალებში, დავინახე, რაც მომხვდა. ცრემლსადენი აირის შაშხანა იყო, ბოლსაც უშვებდა, ჯერ ენთო კიდევ წითლად... მახსოვს, რომ დამიბნელდა თვალებში, ძირს დაცემა ვერ მოვახერხე, გვერდით იმდენი ადამიანი იყო. მომკიდეს ხელი, ძირს ვერ დავეცი. წამიყვანეს სასწრაფოების მხარეს".

მისივე თქმით, დარბევაზე პასუხისმგებლობა მაშინდელმა შს მინისტრმა და მოქმედმა პრემიერ-მინისტრმა, გიორგი გახარიამ უნდა აიღოს:

"ელემენტარული, მე რომ ვყოფილიყავი მაგათ ადგილზე, მე რომ მდომოდა აქციის დარბევა, წყლით დავასველებდი ხალხს და "ვსიო"… სველი ადამიანი აქციაზე არ გაჩერდებოდა, რა, არავითარ შემთხვევაში. რა შუაშია ცრემლსადენი გაზი და რეზინის და პლასტმასის ტყვიები? რატომ? როცა არსებობს ბევრად ჰუმანური საშუალება — წყალი. ეს არ არის ჩვენი გამოგონება, და გამოცდილი ხერხია განვითარებულ ქვეყნებში".

დავით ფარადაშვილთან ერთად დაზარალებულის სტატუსი არ აქვს მაკო გომურსა და გიორგი სულუაშვილს, რომელთაც 20 ივნისის აქციის დაშლისას თვალი დაკარგეს.

საიამ გაავრცელა ინფორმაცია, რომ ივნისის მოვლენებთან დაკავშირებით დაზარალებულად უფრო მეტი სამართალდამცავია ცნობილი, ვიდრე აქციის მონაწილე. მონაცემების მიხედვით, დაზარალებულად 67 სამართალდამცავი და 4 მოქალაქეა ცნობილი. ამავე საქმეზე ბრალი წაუყენეს 3 სამართალდამცავსა და 17 მოქალაქეს.