იუსტიციის უმაღლესი საბჭოს წევრი ანა დოლიძე აცხადებს, რომ პრეზიდენტს არ აქვს უფლება ის გაიწვიოს და თუ ამ გადაწყვეტილებას მიიღებს, კონსტიტუციას დაარღვევს. მისი თქმით, ეს არის ხაფანგი, რომლითაც პრეზიდენტი "თავს ჩაიყენებს იმპიჩმენტის საფრთხის ქვეშ".

იუსტიციის უმაღლესმა საბჭომ ანა დოლიძის გაწვევის მოთხოვნით პრეზიდენტს მიმართა. ამის შესახებ 4 ნოემბერს გახდა ცნობილი, თუმცა წერილი პირველი ოქტომბრით თარიღდება.

იუსტიციის უმაღლესი საბჭოს მოსამართლე წევრი, დიმიტრი გვრიტიშვილი მიიჩნევდა, რომ დოლიძე პოლიტიკურ საქმიანობას ეწევა და მას სხვა წევრებიც უჭერდნენ მხარს:

"იგი უკვე არსებითად ახორციელებს პოლიტიკურ საქმიანობას, რაც აბსოლუტურად შეუთავსებელია იუსტიციის საბჭოს წევრობის სტატუსთან. ასევე იგი სისტემატიურად არღვევს საჯარო მოსამსახურის ეთიკას. მისი ქმედებები არამხოლოდ სასამართლო ხელისუფლების დისკრედიტაციისკენაა მიმართული, არამედ ზიანს აყენებს მის თანამდებობაზე დამნიშვნელ მნიშვნელოვან სახელმწიფო ინსტიტუტს, საქართველოს პრეზიდენტსაც", — აღნიშნა რამდენიმე დღის წინ დიმიტრი გვრიტიშვილმა.

ანა დოლიძე 2018 წლის 8 იანვარს დაინიშნა იუსტიციის უმაღლესი საბჭოს წევრად დაინიშნა. მისი კანდიდატურა ყოფილმა პრეზიდენტმა, გიორგი მარგველაშვილმა წარადგინა.