სახელმწიფო მინისტრი შერიგებისა და სამოქალაქო თანასწორობის საკითხებში ქეთევან ციხელაშვილი აცხადებს, რომ გამშვები პუნქტის ჩაკეტვა სიკვდილ-სიცოცხლის საკითხია და ადგილობრივი მოსახლეობა კრიტიკულ მდგომარეობაშია. მინისტრი მოუწოდებს პასუხისმგებელ პირებს, რომ ე.წ. საზღვარი გახსნან.

"ეს ტრაგედია არ არის ერთადერთი, საუბედუროდ. მოსახლეობას სჭირდება გადაადგილება სასიცოცხლო საჭიროებებსითვის. ისევე როგორც, ამ ქალბატონს და მის ოჯახს. ეს არის ნამდვილად მორიგი მსხვერპლი საოკუპაციო რეჟიმის", — ასე გამოეხმაურა ის ცხინვალის საავადმყოფოში ქალის გარდაცვალებას, რომელიც საოკუპაციო რეჟიმმა თბილისში სამკურნალოდ არ გაუშვა.

ახალგორის მუნიციპალიტეტის გამგებლის თქმით, მას ოკუპირებული ტერიტორიიდან შეშფოთებული მოსახლეობა უკავშირდება. მისი თქმით, ხალხს ეშინია, რომ თუ ავად გახდებიან, ცხინვალში ვერანაირ დახმარებას ვერ მიიღებენ.

ახალგორის მაცხოვრებელი გუშინ, 28 ოქტომბერს გარდაიცვალა. მედიაში გავრცელებული ინფორმაციით, ის სასწრაფო დახმარებამ სახლიდან მძიმე მდგომარებაში გამოიყვანა და თბილისში წაყვანა სცადა, თუმცა ე.წ. მესაზღვრეებმა ცხინვალში გადაამისამართეს, სადაც საავადმყოფოში გარდაიცვალა.

გარდაცვლილის შვილი მთავარ არხთან სატელეფონო ინტერვიუში აცხადებს, რომ სავარაუდოდ, დედის დაკრძალვას ვერ დაესწრება, რადგან ე.წ. საზღვარი ისევ ჩაკეტილია.