"ამერიკელებმა, 8 ნოემბერს, საპრეზიდენტო არჩევნებში ხმის მიცემის დროს უნდა გაითვალისწინონ, რომ ტრამპისთვის მიცემული ხმა მსოფლიო მშვიდობას უზრუნველყოფს. მაგრამ თუ ისინი ხმას მისცემენ ჰილარის, მაშინ აირჩევენ ომს. ეს იქნება მოკლემეტრაჟიანი ფილმი სადაც ყველგან ჰიროსიმას და ნაგასაკის ვნახავთ" - განაცხადა რუსეთის ლიბერალ-დემოკრატიული პარტიის ერთ-ერთმა ლიდერმა ვლადიმერ ჟირინოვსკიმ. ინფორმაციას Reuters ავრცელებს.

ჟირინოვსკიმ აღნიშნა, რომ რუსეთს და ამერიკას შორის ურთიერთობა იმდენად დაძაბულია, რომ ამაზე უარესი მხოლოდ ომის დაწყება შეიძლება იყოს. თუმცა ურთიერთობის დასტაბილურების გარანტია საპრეზიდენტო არჩევნებში დონალდ ტრამპის გამარჯვება იქნება:

"ტრამს აქვს შესანიშნავი შანსი ორი ქვეყნის ურთიერთობა უფრო მშვიდი გახადოს. ის ერთადერთია ვისაც ამის გაკეთება შეუძლია"

ჟირინოვსკიმ აღნიშნა, რომ ტრამპის პოლიტიკა იმდენად სწორია, მას აქვს შანსი ნობელის პრემია აიღოს მშვიდობის დარგში. მან ისაუბრა მიზეზებზეც, თუ რატომ მიიჩნევს ჰილარი კლინტონს ცუდ კანდიდატად. მისი განცხადებით 2009-2013 წლებში სახელმწიფო მდივნის პოზიციაზე ყოფნისას ჰილარიმ დაამტკიცა, რომ მას არ შეუძლია ქვეყნის სწორად მართვა.

ჟირინოვსკიმ დისკრიმინაციული შეფასებები გააკეთა და აღნიშნა, რომ ისეთ სახიფათო ქალ კანდიდატს, როგორიც ჰილარია ქვეყნის მართვის საშუალება არ უნდა მიეცეს, რადგან ის ბირთვულ ომს დაიწყებს:

"ყველა ამერიკელმა მხარი უნდა დაუჭიროს ტრამპს, იმიტომ რომ მამაკაცებს მართვის მილიონ წლიანი გამოცდილება აქვთ. ამერიკელებს არ აქვთ უფლება, გარისკონ და ერთ-ერთი ყველაზე მდიდარი და ძლიერი ქვეყანა ქალს ჩააბარონ სამართავად."

ჟირინოვსკიმ ისაუბრა პუტინისა და ტრამპის ურთიერთობაზეც, რომელიც დიდი ხანია მსოფლიო განხილვის საგნად იქცა:

"მათ შეუძლიათ მჭიდრო საქმიანი ურთიერთობა ჩამოაყალიბონ. ტრამპის გამარჯვება საჩუქარი იქნება კაცობრიობისთვის. ჰილარის გამარჯვების შემთხვევაში კი, ამერიკას ბოლოჯერ ეყოლება პრეზიდენტი."

ტრამპის და რუსეთის ურთიერთობა აქტუალური, მას შემდეგ გახდა რაც დემოკრატიული პარტიის კომპიუტერებიდან მეილები მოიპარეს, რომელიც WikiLeaks-სმა გამოაქვეყნა. გავრცელებული აზრით, ჰაკერული თავდასხმის უკან რუსეთი იდგა და საპრეზიდენტო არჩევნებზე გავლენის მოხდენას ცდილობდა.

მოგვიანებით, 2015 წლის 31 ივლისს, რესპუბლიკელების კანდიდატმა ჟურნალისტებთან შეხვედრისას განაცხადა: "კარგად შევეწყობი ვლადიმერ პუტინს".

ჟურნალისტების კითხვაზე, რას გულისხმობდა კანდიდატი, ტრამპმა უპასუხა:

"მე ვფიქრობ, რომ კარგად შევეწყობოდი მას. ის ვერ იტანს ობამას, ობამა ვერ იტანს მას. ჩვენ საშინელი ურთიერთობები გვაქვს. ჰილარი კლინტონი სახელმწიფო მდივანია. ის ყველაზე ცუდი სახელმწიფო მდივანია ქვეყნის ისტორიაში. მისი მოღვაწეობის დროს ჩვენ ვაფეთქებდით ტერიტორიებს, ახლა მას სურს პრეზიდენტობა".

მოგვიანებით 2015 წლის 17 დეკემბერს ვლადიმერ პუტინმა ტრამპი საპრეზიდენტო არჩევნების მარათონის ლიდერად დაასახელა.

"ის ძალიან ენერგიული ადამიანია, უდავოდ ნიჭიერი"

რამდენიმე საათის შემდეგ ტრამპმა პუტინის შეფასებას უპასუხა:

"ყოველთვის ძალიან დიდი ჯილდოა, როცა ასე კარგ კომპლიმენტს გიკეთებს ადამიანი, რომელსაც ძალიან დიდ პატივს სცემენ მის ქვეყანაში და ფარგლებს გარეთ. მე ყოველთვის ვთვლიდი, რომ რუსეთი და ამერიკა კარგ ურთიერთობაში უნდა იყვნენ და გაერთიანდნენ ტერორიზმის წინააღმდეგ საბრძოლველად, მსოფლიო მშვიდობის აღსადგენად. ამავდროულად სავაჭრო და სხვა კომუნიკაციებიც უნდა აღდგეს ურთიერთპატივისცემის ხარჯზე."

მოგვიანებით კი ტრამპმა განაცხადა, რომ პუტინი მას უფრო დიდ პატივს სცემს ვიდრე ჰილარი კლინტონს, რაც ვლადიმერ ჟირინოვსკის განცხადებამ დაადასტურა, რომელიც კრემლის იდეები აქტიური მხარდამჭერია.

ამ ეტაპზე რესპუბლიკელების კანდიდატის და რუსეთის პრეზიდენტის ურთიერთობა ამით შემოიფარგლება. დონალდ ტრამპი და ჰილარი კლინტონი საპრეზიდენტო არჩევნებისთვის ემზადებიან. აშშ-ში საპრეზიდენტო არჩევნები 8 ნოემბერს გაიმართება.