შინაგან საქმეთა მინისტრი, ვახტანგ გომელაური აცხადებს, რომ რუსი სამხედროების მიერ საოკუპაციო ხაზთან ღობის გავლებით ან ბანერის აღმართვით ტერიტორიები არ დაკარგულა. გომელაური ფიქრობს, რომ ოკუპირებულ ტერიტორიებთან "ვითარება გამწვავებული ნამდვილად არ არის". ამის შესახებ მან დღეს, 26 ოქტომბერს ჟურნალისტებთან საუბრისას თქვა.

"ძალიან სამწუხაროა, ასე რომ აფასებენ ხოლმე, გაავლებენ ოსურ-რუსული მხარე 100 მეტრ ღობეს და ამბობენ, დაკარგა სახელმწიფომ კიდევ ახალი ტერიტორიები. ტერიტორიები დავკარგეთ ჩვენ 2008 წლის ომის შემდეგ. ეს კარგად უნდა აიხსნას, ალბათ, მთავრობის ასახსნელიცაა. სადაც ღობე არ არის გავლებული გადავდივართ? შევდივართ? ვხნავთ და ვთესავთ? ნათესავებთან მივდივართ? ვერ მივდივართ, დაკეტილია. ღობე იქნება იქ თუ უკაცრავად და რუსული ჯარი იდგება და არ შეგვიშვებენ ჩემთვის ერთი და იგივეა...ოკუპაცია გრძელდება, ღობის გავლება გრძელდება, დაკარგულია ეს ტერიტორიები, ღობე არ არის გავლებული აფხაზეთის მხარეს და არ გვაქვს დაკარგული აფხაზეთი? ზემო სვანეთში, კოდორის ხეობაში ღობე არაა და დაკარგული არ გვაქვს?" — აღნიშნა ვახტანგ გომელაურმა.

რამდენიმე დღის წინ ევროკავშირის სადამკვირვებლო მონიტორები საოკუპაციო რეჟიმის წარმომადგენლებმა დააკავეს. ევროკავშირის მისიის ცნობით, ისინი თბილისის მიერ კონტროლირებად ტერიტორიაზე აიყვანეს. EUMM ღრმა შეშფოთებას გამოხატავს იმის გამო, რომ შეიარაღებული პირები არ აძლევენ დამკვირვებლებს საშუალებას, თავიანთი მანდატის ფარგლებში იმუშაონ.

დე ფაქტო ხელისუფლება მომხდარს "პროვოკაციად" აფასებს და აცხადებს, რომ "ქართული სპეცსამსახურები აქტიურად აგრძელებენ ამგვარ პოლიტიკას". მათი მტკიცებით სადამკვირვებლო მისიის წარმომადგენლებმა ე.წ. საზღვარი გადაკვეთეს.

ბორდერიზაციის პოლიტიკა 2011 წელს დაიწყო, 2008 წლის ომიდან 3 წლის შემდეგ. ჰერითიჯის ფონდის კვლევის მიხედვით, ე.წ. ბორდერიზაცია რუსეთის უსაფრთხოების ფედერალური სამსახურისა (FSB) და ადგილობრივი სეპარატისტული ძალების მიერ ხორციელდება. საოკუპაციო ხაზთან არის საქართველოს მოქალაქეების გატაცებებისა და უკანონო დაკავებების ფაქტები.