ცოტა ხნის წინ ცნობილმა ამერიკელმა რეპერმა, კანიე ვესტმა გადაცემა Apple Music Beats 1-ში თავის ცხოვრებაზე, კარიერასა და სამომავლო გეგმებზე ისაუბრა. ინტერვიუს განმავლობაში მომღერალი კითხვებს საკმაოდ გულახდილად პასუხობდა და თავისი განვლილი კარიერაც თამამად შეაფასა:

"უთუოდ ყველა დროის ყველაზე დიდებული არტისტი ვარ. ეს ხომ ფაქტია."

ამის შემდეგ ვესტმა ხაზი იმასაც გაუსვა, რომ ამერიკის საპრეზიდენტო არჩევნებში მონაწილეობას გეგმავს:

"აუცილებლად მოვა ის დრო, როცა ამერიკის პრეზიდენტი გავხდები და ყველა მემახსოვრება, ვინც ვერ შეძლო გაეგო, თუ რას ვქმნიდი კულტურაში".

42 წლის მომღერალი აქამდეც გამოირჩეოდა მსგავსი კონტროვერსული ქმედებებით, მათ შორის მას არაერთხელ გამოუმჟღავნებია ამერიკის ამჟამინდელი პრეზიდენტის, დონალდ ტრამპის მიმართ სიმპათია.

ფოტო: CNN

ოცდამეერთე საუკუნის ამ ნამდვილად ერთ-ერთი ყველაზე მნიშვნელოვანი მუსიკოსის ფანები უკვე დიდი ხანია ელოდებიან მის ახალ ალბომს, რომლის გამოსვლის თარიღიც არაერთხელ გადაიდო. კანიე ვესტის ბოლო ინფორმაციით მისი ახალი ალბომის, Jesus Is A King გამოსვლას დღეს, 25 ოქტომბერს უნდა ველოდოთ.