პრემიერ-მინისტრი, გიორგი გახარია ყოფილი ქალი პროკურორის სექსუალურ შევიწროებაზე გავრცელებულ განცხადებაზე პროკურატურის რეაგირებას ელოდება. პრემიერმა დღეს, 23 ოქტომბერს ჟურნალისტებთან საუბრისას აღნიშნა, რომ ყველა ასეთი შემთხვევა უნდა გამოიძიონ:

"ყველა ის შემთხვევა, სექსუალური შევიწროების, ნეპოტიზმის, უნდა იყოს გამოძიებული. პირველ რიგში დაველოდები პროკურატურის ოფიციალურ რეაგირებას. რა თქმა უნდა, ეს თუ სიმართლეა, ესაა მიუღებელი. პროკურატურა არის დამოუკიდებელი უწყება, რომელმაც თავად უნდა გააკეთოს განმარტება".

ყოფილმა პროკურორმა, სალომე ადეიშვილმა ფეისბუქზე სამსახურიდან წასვლის შესახებ პოსტი დაწერა, რომელშიც პროკურატურაში სექსუალურ შევიწროებაზე, უკანონობასა და ზეწოლაზე საუბრობს.