პოლიციამ აზერბაიჯანში ფემიციდის საწინააღმდეგო აქცია დაშალა. სამართალდამცავებმა მიზეზად აქციის არასანქცირებულობა დაასახელეს.

აქციის მონაწილეები ითხოვდნენ, რომ ხელისუფლებამ ქალებზე ძალადობის წინააღმდეგ კანონი გაამკაცროს და სტამბულის კონვენციას მოაწეროს ხელი, რომელიც ავალდებულებს სახელმწიფოს ოჯახური ძალადობის წინააღმდეგ იბრძოლოს.

როგორც რადიო თავისუფლების აზერბაიჯანული ბიური წერს, თავდაპირველად პოლიციამ ქალ აქტივისტებს დაგეგმილ მარშრუტზე გზა ჩაუკეტა. მას შემდეგ რაც მათ ბანერების გაშლა დაიწყეს, სამართალდამცავებმა პლაკატების განადგურება და დემონტსტრანტების დაკავება დაიწყეს. აქციის მონაწილეები სკანდირებდნენ: "არა ქალზე ძალადობას" და "არ გაჩუმდე ძალადობაზე".