ბოლო პერიოდის ნამდვილად ერთ-ერთი ყველაზე საინტერესო და შესაშური ხარისხის სერიალი სატელევიზიო სამყაროში დიდი პატარა ტყუილებია, რომელშიც სხვა ვარსკვლავურ მსახიობებთან ერთად ნიკოლ კიდმანი და ალექსანდრ სკარსგარდიც მონაწილეობდნენ.

თანაც მათ ისეთი წყვილის როლი შეასრულეს შთამბეჭდავად, რომელთა ისტორიასაც ერთი ნახვის შემდეგაც კი ვერ დაივიწყებთ.

სულ რამდენიმე თვის წინ გამოვიდა ამ სერიალის მეორე სეზონი და ისიც ისეთივე წარმატებული აღმოჩნდა, როგორც პირველი. თუმცა, ამ სერიალის გარდა ამ ორი შესანიშნავი მსახიობის ნახვა მალე სრულიად განსხვავებულ პროექტში შეგვეძლება.

რობერტ ეგერსი ბოლო წლების ერთ-ერთი ყველაზე იმედისმომცემი რეჟისორია, რომელმაც ნამდვილად კარგი ჰორორის ჟანრის ფილმის გადაღება შეძლო - The Witch. 18 ოქტომბერს კი მისი ახალი ფილმის The Lighthouse-ს პრემიერა შედგება, რომელშიც რობერტ პატინსონი და უილემ დეფო მონაწილეობენ.

სწორედ ეს რეჟისორი იღებს ახალ ფილმს, რომლის სახელწოდებაც The Northman-ია და მისი სიუჟეტი მეათე საუკუნის ისლანდიაში განვითარდება. როგორც ჩანს, ნიკოლ კიდმანი და ალექსანდრ სკარსგარდი ამჯერად ვიკინგების როლში მოგვევლინებიან.

ფილმის შესახებ სხვა დეტალები ჯერ უცნობია და მისი გადაღებები, სავარაუდოდ, 2020 წელს დაიწყება.