სომხეთის პრემიერ-მინისტრის, ნიკოლ პაშინიანის თქმით, მისი პრემიერობის ყველაზე კარგი მიღწევა სომხურ-ქართული ურთიერთობების მაღალ დონეზე აყვანაა. ამის შესახებ სომხეთის პრემიერმა საქართველოს პრემიერ-მინისტრთან, გიორგი გახარიასთან შეხვედრისას განაცხადა.

"მოხარული ვარ, აღვნიშნო, რომ ორი ქვეყნის ურთიერთობა კიდევ უფრო უმჯობესდება ყველა სფეროში", — აღნიშნა პაშინიანმა.

გიორგი გახარიას ოფიციალური ვიზიტი სომხეთში დღეს, 15 ოქტომბერს დაიწყო. გიორგი გახარიას პატივსაცემად სომხეთის რესპუბლიკის მთავრობის სახლში დახვედრის ოფიციალური ცერემონია გაიმართა.

"მინდა დაგიდასტუროთ, რომ საქართველოს მთავრობა მზად არის, მეტი იმუშაოს იმისთვის, რომ ქართულ-სომხური ურთიერთობები გახდეს კიდევ უფრო ეფექტური, ჩვენი თითოეული მოქალაქის საკეთილდღეოდ. მიუხედავად იმისა, რომ დღეს ჩვენ ძალიან კარგი ურთიერთობები გვაქვს, ვთანხმდებით, რომ შეგვიძლია ის კიდევ უფრო განვავითაროთ, რათა მეტი სარგებელი მოვუტანოთ ჩვენს ხალხს, მათ შორის ეკონომიკაში, მშენებლობაში, ინფრასტრუქტურაში, კულტურაში, სპორტში და ყველა მიმართულებით", — განაცხადა გახარიამ.