The Washington Post-ის ჟურნალისტური გამოძიებით ირკვევა, რომ რუსეთი აფხაზეთში ასობით ჩრდილო კორეელ მუშას არალეგალურად ამუშავებს და ამ გზით გაეროს სანქციების შესრულებას თავს არიდებს.

სანქციები მოითხოვს, მსოფლიოს სხვადასხვა ქვეყანაში მომუშავე ჩრდილო კორეელები 22 დეკემბრამდე დააბრუნონ საკუთარ ქვეყანაში. ამ რეზოლუციას რუსეთმა და ჩინეთმა ორი წლის წინ მოაწერეს ხელი. სწორედ ამ ორმა ქვეყანამ უმასპინძლა ყველაზე მეტ ჩრდილო კორეელს.

"ანალიტიკოსების აზრით, მუშების აფხაზეთში გაგზავნით კრემლი კიმ ჩენ ინის გულს მოიგებს მაშინ, როდესაც მოსკოვი აზიაში აპირებს პოზიციების გაძლიერებას", — ვკითხულობთ სტატიაში.

აფხაზეთში დაახლოებით 400 ჩრდილო კორეელია ჩასული. ისინი, ძირითადად, ოჯახთან ერთად ცხოვრობენ და მუშაობენ იქ. Washington Post-მა გაარკვია, რომ დღის განმავლობაში საცხოვრებელ კორპუსებსა და აფთიაქებს აშენებენ ან აგებენ სარკინიგზო ლიანდაგებს.

"მათ აქ ყოფნა მოსწონთ, აქ თოვლი არ არის", — უთხრა Washington Post-ს ედვარდ გამისონიამ, რომელიც ე.წ. მიგრაციის სამსახურის უფროსის მოადგილეა.

"სექტემბრის ერთ მზიან დილას ჩრდილოეთ კორეელი კაცი, რომელიც საკუთარ თავს "კიმად" (Dr. Kim) მოიხსენიებს, რუსეთის მოქალაქეებს სანაპიროზე არსებულ პატარა ქოხში მასაჟს უკეთებს. მასთან ერთი პროცედურა $7 ღირს.

"ვფიქრობ, რომ ლენინის ბიუსტი მას [კიმს] ამხნევებს. კიმმა ის იცნო", — ამბობს მისი დამსაქმებელი და საკურორტო კომპლექსის მენეჯერი ზურაბ ზუხბა", — წერს The Washington Post.

ფოტო: Joel van Houdt / The Washington Post

ანალიტიკოსების აზრით, 400 ჩრდილო კორეელი აფხაზეთში ძალიან მცირე რაოდენობაა იმ 100 ათასი მუშიდან, რომლებიც სხვადასხვა ქვეყანაში არიან, მაგრამ "ეს მოსკოვის მცდელობაა, შეინარჩუნოს სიცოცხლის ხაზი ფხენიანთან".

გაეროს სანქციების შემდეგ, დღეს რუსეთში 40 ათასიდან 10 ათასამდე ჩრდილო კორეელი რჩება. საგარეო საქმეთა სამინისტროს განცხადებით, ისინი ზედმიწევნით ასრულებენ საერთაშორისო სანქციების მოთხოვნებს. "რაც შეეხება ჩრდილო კერეელი მიგრანტებს ყოფნას აფხაზეთში, უმჯობესია ეს შესაბამის სახელმწიფოსა და მათ დამსაქმებლებს ჰკითხოთ", — უთხრა პრესსპიკერმა მარია ზახაროვამ Washington Post-ს.