ოკუპირებული ტერიტორიებიდან დევნილთა, შრომის ჯანმრთელობისა და სოციალური დაცვის მინისტრის მოადგილე გიორგი წოწკოლაური აცხადებს, რომ დევნილებისთვის ბინების გადაცემის საკითხი მინისტრის კომპეტენცია არ არის. ამის შესახებ მან რუსთავი 2-თან ისაუბრა.

მისი თქმით, თვენახევრის წინ მინისტრი დევნილებს არაერთხელ შეხვდა სანამ კომისია დაიწყებდა მუშაობს ბინების გადაცემის საკითხზე. მისივე თქმით, კომისიის მუშაობის პერიოდში შეხვედრის მოთხოვნა არალეგიტიმური იყო, რადგან დევნილები ითხოვდნენ დადასტურებას ბინების გადაცემაზე.

"განვუმარტეთ არაერთხელ, რომ მინისტრის კომპეტენცია არ არის მათთვის ბინების გადაცემა. ეს არის კომისიის კომპეტენცია, შესაბამისად მუშაობდა კომისია", — აცხადებს ის.

აფხაზეთიდან დევნილები 25 დღეა საპროტესტო აქციას მართავენ ბინების გადაცემის მოთხოვნით. ისინი ჯანდაცვის სამინისტროს შენობაში რჩებოდნენ და მინისტრთან შეხვედრას მოითხოვდნენ. ბოლო ორი დღის განმავლობაში ადგილზე სიტუაცია დაიძაბა და პოლიცია იყო მობილიზებული.

პროტესტი განსაკუთრებით დაიძაბა გუშინ, 11 ოქტომბერს, როცა იმ დევნილების სია გამოქვეყნდა, ვისაც ბინა გადაეცემა. პროტესტი მონაწილეები ამ სიაში ვერ მოხვდნენ. ისინი აცხადებენ, რომ კრიტერიუმებს აკმაყოფილებენ და ბინები ეკუთვნით. მათი თქმით, აღარ აქვთ იმის საშუალება, რომ ქირით იცხოვრონ და სახელმწიფოსგან დახმარება სჭირდებათ.