5 მაისს ევროპა ლიგის ფინალური წყვილის ვინაობა გაირკვა.

ნახევარ-ფინალებში ლივერპული - ვილიარეალისა და სევილია - დონეცკის შახტარის მატჩები გაიმართა.

ორი მატჩის ჯამში მომდევნო ეტაპზე ლივერპული და სევილია გავიდნენ. გუნდები ერთმანეთს 18 მაისს, შვეიცარიის ქალაქ ბაზელში სენტ ჯეიკობ-პარკის სტადიონზე დაუპირისპირდებიან.

სევილია ტურნირის ამჟამინდელი ჩემპიონია, შესაბამისად ის ბაზელში თავის ტიტულს დაიცავს. მოგების შემთხვევაში ესპანური გუნდისთვის ეს ზედიზედ მესამე თასი იქნება. შარშან მათ დნეპროპეტროვსკის დნიპრო დაამარცხეს 3-2, ხოლო 2013-2014 წლის სეზონის ფინალში კი პორტუგალიურ ბენფიკას 4-2 აჯობეს პენალტების სერიაში - მას შემდეგ რაც ძირითადი და დამატებითი დროები 0-0 დასრულდა.

ლივერპულს ევროპა ლიგის ფინალში, ბოლოს 2000-2001 წლის სეზონში აქვს ნათამაშები, მათ დრამატულ თამაშში ესპანურ ალავესს მოუგეს.

ფინალური თამაში 18 მაისს თბილისის დროით 22:45 სთ.-ზე დაიწყება.