თბილისის საქალაქო სასამართლომ პრემიერ-მინისტრის, გიორგი გახარიას გინებით გამოწვეული ხმაურის გამო ირაკლი ოქრუაშვილის პარტიის წევრი, გურამ ჩალაგაშვილი 700 ლარით დააჯარიმა. გადაწყვეტილება რამდენიმე წუთის წინ გამოცხადდა.

"30-პროცენტიანი ფასდაკლება ისწავლა ჩვენმა ხელისუფლებამ. ხაზარაძეს მოსთხოვეს მილიონი და დაუკლეს, 700 ათასი გადაახდევინეს. მე მომთხოვეს 1 000, დამიკლეს და 700 ლარის გადახდა მომთხოვეს. ამ თანხას ვინ გადაიხდის გაცნობებთ მომავალ კვირაში. ის, რომ სამართალი არაა ამ ქვეყანაზე, ამაზე ორი აზრი არაა", — განაცხადა ჩალაგაშვილმა.

როგორც სასამართლო სხდომაზე მყოფი On.ge-ის ჟურნალისტი იუწყება, შინაგან საქმეთა სამინისტრომ სამხრე კამერის ჩანაწერის გარდა, სხვა მტკიცებულებები ვერ წარადგინა. ჩანაწერში ისმის გურამ ჩალაგაშვილის გინების ხმა.

სხდომაზე პატრულის თანამშრომლები აპელირებდნენ, რომ ჩალაგაშვილმა მოქალაქეთა სიმშვიდე დაირღვა. დაცვის მხარემ კი განმარტა, რომ ეს ქმედება ვერ იქნება სამართალდარღვევა, რადგან არ არსებობს პირი რომლის სიმშვიდეც დაირღვა.

გურამ ჩალაგაშვილი საზოგადოებრივი წესრიგის დარღვევის მოტივით პოლიციამ პირველ ოქტომბერს დააკავა.