დღეს, 7 ოქტომბერს თბილისში ვიზიტისას გამართულ პრესკონფერენციაზე გერმანიის პრეზიდენტმა ფრანკ-ვალტერ შტაინმაიერმა განაცხადა, რომ დღესდღეობით გერმანულ პრესაში ძალიან ბევრი ინფორმაციაა საქართველოზე. შტაინმაიერმა ქვეყნის პოპულარიზაცია გერმანიაში 2018 წელს გამართულ ფრანკფურტის წიგნის ბაზრობის კონტექსტში მოიხსენია:

"პირველად მთელი სიმდიდრე გამოჩნდა ქართულ-გერმანული ურთიერთობებისას. ძალიან ბევრი ავტორი წარმოჩინდა, ბევრი ქართველი ავტორი გაიცნო, როგორც გერმანიამ, ასევე, სხვა ქვეყნებმა. დღესდღეობით გერმანულ გაზეთსა თუ ჟურნალს რომ გაეცნო, ძალიან ბევრი ინფორმაციაა საქართველოზე, პრაქტიკულად ყველა გაზეთსა თუ ჟურნალში, ქართულ ლიტერატურაზე, ქართულ კულტურაზე, ასევე, სვანეთში მგზავრობის შემოთავაზებაზე, თუ რთველზე დასწრებაზე კახეთში. სწორედ ის შედეგი დგება, რომ საქართველო გერმანელი ტურისტებისათვის ძალიან მიმზიდველია".

2018 წელს საქართველო ფრანკფურტის წიგნის ბაზრობაზე საპატიო სტუმრის სტატუსით წარდგა. გერმანულენოვანი აუდიტორიის ფოკუსში ქართული პროგრამა კონცეფციით Georgia Made by Characters / ანბანით მოთხრობილი საქართველო იყო წარმოდგენილი, რომელიც ერთი მხრივ, უნიკალურ ქართულ ანბანსა და უნიკალურ დამწერლობას, მეორე მხრივ კი ქართულ ხასიათებსა და პერსონაჟებს ეფუძნებოდა.