გირჩმა გადაწყვიტა ტაქსების რეგულაცია "საგანმანათლებლო ბიზნესით" გააპროტესტოს. "თავისუფლების იდეის გასავრცელებლად" პარტიამ შმAXI შექმნა. "დიპოლიანი მძღოლები" თბილისის ქუჩებში ხვალიდან იმოძრავებენ და მგზავრებს სალექციო კურსს შესთავაზებენ. გირჩში უნდათ, რომ შმAXI-ის მძღოლებმა მგზავრებს აუხსნან "რას ნიშნავს თავისუფლება ჩვენი გაგებით, როგორ ვუყურებთ თავისუფლებას, რა ბოროტებაა რეგულაციები და ზოგადად ადამიანების შემზღუდავი კანონმდებლობა".

გირჩის ერთ-ერთი ლიდერის იაგო ხვიჩიას თქმით, მძღოლი მთავარია ორ პირობას აკმაყოფილებდეს, ჰქონდეს მართვის მოწმობა და ადამიანებისთვის თავისუფლების იდეის გავრცელების სურვილი. იმ მძღოლებისთვის, ვინც მზად არაა მგზავრს თავად ესაუბროს გირჩს წინასწარ გამზადებული აუდიო სალექციო კურსი აქვს.

"ვეცდებით, რომ საბჭოთა ცნობიერების ადამიანის განსაბჭოება მოხდეს. ეს ლექციები მიმართული იქნება იმისკენ, რომ ჩვენ დავძლიოთ საბჭოთა წარსული, გამოვიდეთ კომუნიზმიდან და განვთავისუფლდით უაზრო იდეებისგან... ლექციების ძირითადი ნაწილი ნობელიანტი მწერლებისაა, რომლებსაც ბევრი უმსჯელიათ თავისუფლების იდეაზე. ლექციები იქნება ბევრი სახის, ძირითადად თარგმანები ცნობილი მეცნიერების გამოსვლებიდან", — ამბობს On.ge-სთან საუბრისას იაგო ხვიჩია.

პარტიაში ამბობენ, რომ, როგორც სხვა ტაქსის კომპანიები, ისინიც მომსახურებას ყიდიან, არ ჰყავთ მანქანები, არ უზრუნველყოფენ საწვავს და სხვა დეტალებს. ტაქსის გამოსაძახებლად აპლიკაციის შექმნას აპირებენ, მანამდე კი ცხელი ხაზი ამოქმედდება.

"ადამიანები დაინახავენ შმAXI-ის ტრაფარეტიან მანქანას და უნდა ესმოდეთ, რომ ეს მანქანა არის ისეთი მანქანა, სადაც ადამიანები იღებენ განათლებას, ანუ საგანმანათლებლო პროექტში არიან და მათ მოუწევთ მოისმინონ თავისუფლების იდეების შესახებ და ამაში გადაიხადონ საფასური", — განმარტავს იაგო ხვიჩია.

საგანმანათლებლო ტაქსიში ფასიც განსხვავებულად ანგარიშდება. საცდელი პრინციპის მიხედვით, ტარიფი დამოკიდებულია იმაზე, თუ რა ლექციას რამდენი ხნის განმავლობაში უსმენდა ადამიანი.

"ლექციების საბაზისო პაკეტი გამზადებულია და მას დაემატება სხვა ლექციები იმის მიხედვით თუ რა სიგიჟეებს მოიმოქმედებს მთავრობა", — თქვა იაგო ხვიჩიამ.

შმAXI-ის შესახებ

კომპანია შმAXI გირჩმა თბილისში ტაქსის რეგულაციების ამოქმედების გასაპროტესტებლად დააფუძნა. პარტიაში აცხადებენ, რომ კომპანია უნივერსიტეტია და მოქალაქის ერთი ადგილიდან მეორე ადგილზე გადაყვანის დროს საგანმანათლებლო საქმიანობას ეწევა. რეალურად შმAXI არის გზა, რომლის საშუალებითაც ტაქსის რეგულაციის თავის არიდებაა შესაძლებელი და მძღოლებს ნებისმიერი ფერის მანქანით მგზავრის გადაყვანა შეუძლიათ.