მაჰათმა განდი, რომელიც ცნობილია, როგორც ინდოეთის "ერის მამა", 150 წლის წინ ამ დღეს, 1868 წლის 2 ოქტომბერს დაიბადა. ეს თარიღი ინდოეთში სამ ყველაზე მნიშვნელოვან სახელმწიფო დღესასწაულს შორის ერთ-ერთია, რომლის დროსაც მთელი ქვეყნის მასშტაბით მასობრივი ღონისძიებები იმართება. 2007 წლიდან გაერთიანებული ერების ორგანიზაციამ კი სწორედ ამ დღეს განდის საპატივცემულოდ ძალადობის საწინააღმდეგო საერთაშორისო დღის აღნიშვნა დაიწყო.

მისი ნამდვილი სახელი და გვარი მოჰანდას კარამჩანდ განდია, რომელსაც მაჰათმა 1914 წელს შეარქვეს დიდი პატივისცემის ნიშნად - მაჰათმა ითარგმნება, როგორც დიადი სული.

ის იყო მწერალი, საზოგადოებრივი აქტივისტი და პოლიტიკოსი, რომელმაც არაძალადობრივი მეთოდებით გაილაშქრა ინდოეთში დიდი ბრიტანეთის კოლონიალისტური პოლიტიკის წინააღმდეგ. მან უზარმაზარი როლი შეასრულა იმაში, რომ ინდოეთი გათავისუფლებულიყო ძალადობრივი მმართველობისგან და დამოუკიდებლობა მოეპოვებინა. სწორედ ამ ფაქტიდან მალევე, 1948 წლის 30 იანვარს განდი მოკლეს.

მაჰათმა განდი ერთ-ერთ საპროტესტო აქციაზე.

ფოტო: Central Press/Getty Images

განდის შეხედულებებმა პოლიტიკაზე და ზოგადად კაცობრიობის შესახებ მისმა კეთილშობილურმა მსოფლმხედველობამ შემდეგში გავლენა მოახდინა ისეთ ცნობილ ადამიანებზე, როგორებიც არიან მარტინ ლუთერ კინგი, ნელსონ მანდელა და სხვა.