რუსეთის პრეზიდენტი ვლადიმერ პუტინი ამტკიცებს, რომ ყოველთვის ასრულებს ნაკისრ ვალდებულებებს. ასე უპასუხა მან რუსთავი 2-ის ჟურნალისტის, მარიამ მენაბდის კითხვას საქართველოს ოკუპირებული ტერიტორიებიდან ჯარების გაყვანის შესახებ

"როდის დაიწყებთ თქვენი ვალდებულებების შესრულებას, რომელიც 2008 წელს აიღეთ?" — ჰკითხა ჟურნალისტმა სომხეთის პრეზიდენტის ადმინისტრაციაში მიმავალ პუტინს მას შემდეგ, რაც აცნობა, რომ ქართული ტელევიზიიდან იყო.

"ჩვენ ყოველთვის ვასრულებთ ნაკისრ ვალდებულებებს", — თქვა პუტინმა და გზა გააგრძელა. მან აღარ უპასუხა კითხვას, თუ როდის გავლენ ჯარები საქართველოდან.

ვლადიმერ პუტინი სხვა ლიდერებთან ერთად ერევანში ევრაზიული ეკონომიკური კავშირის შეხვედრას ესწრება.