ამერიკის შეერთებული შტატების სახელმწიფო მდივანი მაიკ პომპეო გიორგი გახარიას საქართველოს პრემიერ-მინისტრის თანამდებობის დაკავებას ულოცავს. მანვე აშშ-საქართველოს ურთიერთობის გაღრმავების მნიშვნელობაზე ისაუბრა.

"ველით თქვენთან თანამშრომლობას აშშ-საქართველოს სტრატეგიული პარტნიორობის ქარტიის ფარგლებში ჩვენი ორმხრივი ურთიერთობების გასაღრმავებლად ისეთ სფეროებში, როგორიცაა დემოკრატია და მმართველობა, ეკონომიკა და სავაჭრო თანამშრომლობა, თავდაცვა და უსაფრთხოება, ასევე ადამიანთა შორის კონტაქტები და კულტურული გამოცდილების გაზიარება. ამერიკის შეერთებული შტატები ადასტურებს ურყევ მხარდაჭერას რუსული აგრესიის საფრთხის წინაშე მდგარი საქართველოს ტერიტორიული მთლიანობისა და სუვერენიტეტის მიმართ".

სახელმწიფო მდივნის თქმით, აშშ ერთგულია 2008 წლის ნატოს ბუქარესტის სამიტის გადაწყვეტილების, რომლის თანახმად საქართველოს გახდება ალიანსის წევრი.

გიორგი გახარიას გაპრემიერება აშშ-ს სახელმწიფო დეპარტამენტის ყოფილმა მაღალჩინოსნებმა, მეთიუ ბრაიზამ "დემონსტრაციებისთვის პროვოკაციულ ნაბიჯად" შეაფასა 20 ივნისის მოვლენების შემდეგ.

პარლამენტში მმართველმა პარტიამ ქართულმა ოცნებამ გიორგი გახარიას მთავრობა 8 სექტემბერს დაამტკიცა. გახარიას გაპრემიერებას კრიტიკულად შეხვდნენ ოპოზიცია და #სირცხვილიას სამოქალაქო აქტივისტები, რომლებიც თითქმის სამი თვეა შს მინისტრის პოსტიდან გახარიას გადადგომას ითხოვდნენ. ისინი დღეს უკვე მის დაწინაურებას აპროტესტებენ.

ნაციონალურმა მოძრაობამ და ევროპულმა საქართველომ კომიტეტებში გახარიას მთავრობის მოსმენას ბოიკოტი გამოუცხადეს და მხოლოდ ფრაქციის ფორმატში დაუსვეს კითხვები. გარდა ამისა, ოპოზიციას კენჭისყრაშიც არ მიუღია მონაწილეობა.