ექსპრეზიდენტი მიხეილ სააკაშვილი ვიდეოთი გამოეხმურა საზოგადოების კრიტიკას, რომელიც მის გუშინდელ განცხადებებს მოყვა. სააკაშვილმა მთავარი არხის ეთერში განაცხადა, რომ ევროპული საქართველოს ლიდერ გიგა ბოკერიასთან ფუნდამენტური განსხვავება აქვს, რადგან ჯვარს ატარებს. მან, ასევე, ტრადიციების მნიშვნელობაზე ისაუბრა. დღეს კი იგივე გაიმეორა.

"საქართველოს დროშას მაინც არ უყურებთ ხანდახან მეგობრებო? რა თქმა უნდა, ეს არის ხაზგასმა არამხოლოდ ჩვენი ფუნდამენტური ღირებულების, არამედ ეს არის ის, რასაც ჩვენი ხალხის აბსოლუტური უმრავლესობა ფიქრობს და ემხრობა. მე მოვუწოდებ ყველას, რომ ნუ მოვწყდებით ჩვენს ხალხს. დიახ ჩვენ ვეფუძნებით ჩვენს ტრადიციებს", — ამბობს ის.

ამავდროულად სააკაშვილი აცხადებს, რომ მას და მის გუნდს ყველაზე ინოვაციური გეგმები აქვს, მაგრამ ეს არ ეწინააღმდეგება იმას, რომ "ტრადიციულები" იყვნენ.

სააკაშვილის განცხადებები კრიტიკის ობიექტი გახდა. სამოქალაქო საზოგადოება ექსპრეზიდენტს პოპულიზმში ადანაშაულებს. ევროპული საქართველოს ერთ-ერთმა ლიდერმა, სერგო რატიანმა ის შავრაზმელებს შეადარა, გიგი უგულავამ კი დაწერა, რომ სირცხვილია და ამ ფაქტს ვერ შეაფასებს. ნაციონალური მოძრაობის ლიდერმა, ნიკა მელიამ კი ფეისბუქმეგობრებს ჰკითხა რჩევა.

დღეს, 30 სექტემბერს მთავარი არხის ეთერში მიხეილ სააკაშვილმა ევროპული საქართველოს ლიდერს, გიგა ბოკერიას ბრალს დასდო "ტრადიციული, ქართული, ქრისტიანული ფასაულობებისგან დისტანცირებაში".

სააკაშვილს მთავარი აქცენტების წამყვანებმა ევროპულ საქართველოსთან განსხვავებაზე დაუსვეს კითხვა, რის პასუხადაც მან იმის მტკიცება დაიწყო, რომ შეიძლება ბევრს არ სჯერა, მაგრამ ქრისტიანია და ჯვარსაც ატარებს. ამის შემდეგ სააკაშვილი ბოკერიას კრიტიკადაიწყო.

"მთელი ეს წლები განსაკუთრებულად ცინიკური დამოკიდებულება ქართული ტრადიციებისა და ფასეულობების მიმართ. ჩვენი ფასეულობები, რომელიც ჩვენთვის არის უძვირფასესი... ბოკერია არის ყველაფერი, პრინციპში, რაც არის ქართული ტრადიციების წინააღმდეგ", — განაცხადა სააკაშვილმა.

გადაცემის ერთ-ერთმა წამყვანმა, ნიკა გვარამიამ მას უთხრა, რომ ეს პოპულისტურ განცხადებად ჟღერდა, თანაწამყვანმა ეკა კვესიტაძემ კი განუმარტა, რომ იგივე რიტორიკით და უარგუმენტოდ საუბრობდნენ ქართული მარში და სხვა ანტიდასავლური ორგანიზაციები ბოკერიაზე და თავად სააკაშვილზეც. პასუხად სააკაშვილმა განაცხადა, რომ ის ბოკერიას არ ჰგავს, რადგან ბევრი ეკლესია აქვს აშენებული.

,