საქართველოს ექსპრეზიდენტი მიხეილ სააკაშვილი ყოფილ თანაგუნდელს და ამჟამად ევროპული საქართველოს ლიდერს, გიგა ბოკერიას აკრიტიკებს. სააკაშვილი მას ბრალს დებს "ტრადიციული, ქართული, ქრისტიანული ფასეულობებისგან დისტანცირებაში". ამის შესახებ მან მთავარი არხის ეთერში ისაუბრა.

სააკაშვილს მთავარი აქცენტების წამყვანებმა ევროპულ საქართველოსთან განსხვავებაზე დაუსვეს კითხვა, რის პასუხადაც მან იმის მტკიცება დაიწყო, რომ შეიძლება ბევრს არ სჯერა, მაგრამ ქრისტიანია და ჯვარსაც ატარებს. მისი თქმით, სწორედ ეს არის ფუნდამენტური განსხვავება ბოკერიასთან.

"ბოკერიას ჰქონდა მთელი ეს წლები განსაკუთრებულად ცინიკური დამოკიდებულება ქართული ტრადიციებისა და ფასეულობების მიმართ. ჩვენი ფასეულობები, რომელიც ჩვენთვის არის უძვირფასესი... ბოკერია არის ყველაფერი, პრინციპში, რაც არის ქართული ტრადიციების წინააღმდეგ", — განაცხადა სააკაშვილმა.

გადაცემის ერთ-ერთმა წამყვანმა, ნიკა გვარამიამ მას უთხრა, რომ ეს პოპულისტურ განცხადებად ჟღერდა, თანაწამყვანმა, ეკა კვესიტაძემ კი განუმარტა, რომ იმავე რიტორიკით და უარგუმენტოდ საუბრობდნენ ქართული მარში და სხვა ანტიდასავლური ორგანიზაციები ბოკერიაზე და თავად სააკაშვილზეც. პასუხად სააკაშვილმა თქვა, რომ ის ბოკერიას არ ჰგავს, რადგან 600 ეკლესია აქვს აშენებული, მათ შორის ბაგრატის ტაძარი.

"რას ნიშნავს პოპულისტური? დასავლეთი დგას ტრადიციულ ფასეულობებზე, დგას ოჯახურ ფასეულობაზე, რელიგიურ ფასეულობაზე", — განაცხადა მან.

მოგვიანებით სააკაშვილმა განმარტა, რომ ეს არ ეხება მთელ ევროპულ საქართველოს და მსგავსი პრეტენზიები კონკრეტულად ბოკერიასთან აქვს. ეს პირველი შემთხვევა არ არის, როდესაც სააკაშვილი გიგა ბოკერიას და მის თანაგუნდელებს კრიტიკულად მოიხსენიებს.