თბილისიმარათონი 2019-თან დაკავშირებით 29 სექტემბერს დილის ცხრა საათიდან შუადღის პირველ საათამდე ტრანსპორტის მოძრაობა რამდენიმე ქუჩაზე შეიზღუდება. ეს მონაკვეთებია: კრწანისის მოედანი (ნაწილობრივ), გორგასლის ქუჩა, აფხაზის ქუჩა, თავისუფლების მოედანი, რუსთაველის გამზირი, ჯავახიშვილის ქუჩა, ტაბიძის ხიდი, მარჯანიშვილის ქუჩა, მარჯანიშვილის მოედნიდან თამარ მეფის გამზირამდე, ბაქოს ქუჩა, წინამძღვრიშვილის ქუჩა, ზაარბრიუკენის მოედანი და მტკვრის მარჯვენა სანაპირო.

მოძრაობის შეზღუდვის გამო საზოგადოებრივი ტრანსპორტის მარშრუტები დროებით შეიცვლება:

  • ორთაჭალის გავლით ბარათაშვილის ქუჩისკენ მოძრავი ავტობუსები #50 და #71 კრწანისის მოედნიდან კვლავ უკუმიმართულებით გაბრუნდებიან;
  • ავტობუსები #44, #55, #80 და #102 კრწანისის მოედნიდან მოძრაობას განაგრძობენ ჯერ ჰოლბრუკის ქუჩაზე, შემდეგ ქეთევან დედოფლის გამზირზე, საიდანაც ბარათაშვილის ქუჩას დაუკავშირდებიან;
  • #31 ავტობუსიც კრწანისის მოედნიდან გაივლის ჰოლბრუკის ქუჩას და ქეთევან დედოფლის გამზირს, რის შემდეგაც მოძრაობას განაგრძობს მტკვრის მარცხენა სანაპიროზე და კვინიტაძის ქუჩიდან თამარ მეფის გამზირზე მოხვდება;
  • ვაკე-საბურთალოდან ბარათაშვილის ქუჩისკენ მოძრავი მარშრუტები მელიქიშვილის გამზირიდან კოსტავას ქუჩაზე ჩაუხვევენ (ფილარმონიასთან) და უკანვე გაბრუნდებიან;
  • ჩუღურეთის რაიონისა და ცოტნე დადიანის ქუჩიდან სადგურის მოედნისკენ ავტობუსები და მიკროავტობუსები იმოძრავებენ ნიკო ფიროსმანის, ივანე ჯავახიშვილისა და გიორგი ჩუბინაშვილის ქუჩების გავლით;
  • ცოტნე დადიანის ქუჩიდან ბარათაშვილის ქუჩისკენ საზოგადოებრივი ტრანსპორტი გაივლის ხეთაგუროვის ქუჩასა და ბარათაშვილის ხიდს;
  • აეროპორტისკენ მოძრავი #37 ავტობუსი ავლაბარს გმირთა მოედნის, მტკვრის მარჯვენა სანაპიროსა და ბარათაშვილის ქუჩით დაუკავშირდება. უკუმიმართულებით გადაადგილებისას, იგი ავლაბრის შემდგომ გაივლის მტკვრის მარცხენა სანაპიროს და თამარ მეფის გამზირზე გენერალ კვინიტაძის ქუჩიდან მოხვდება.