სომხეთის პრემიერ-მინისტრი, ნიკოლ პაშინიანი ამბობს, რომ მთიანი ყარაბაღის კონფლიქტზე ნებისმიერი გადაწყვეტილება აზერბაიჯანელის ხალხისთვისაც მისაღები უნდა იყოს. ამის შესახებ პაშინიანმა FOX 11-თან ინტერვიუში ისაუბრა.

"სხვათა შორის, სომხეთის პირველი ლიდერი ვარ, რომელიც ამბობს, რომ გადაწყვეტილება აზერბაიჯანისთვის მისაღები უნდა იყოს. ამის გამო სომხეთში მაკრიტიკებდნენ, მაგრამ ეს მშვიდობიანი პროცესის მნიშვნელოვანი ნაბიჯია. ამიტომ მე ველი, რომ აზერბაიჯანის პრეზიდენტი ალიევი ამავე ფორმულას მიიღებს", — აღნიშნა პაშინიანმა.

მთიანი ყარაბაღის რეგიონს ამჟამად მთლიანად დე ფაქტო მთიანი ყარაბაღის რესპუბლიკა აკონტროლებს. ყარაბაღმა თავი დამოუკიდებლად 1991 წლის 2 სექტემბერს გამოაცხადა. ის მოიცავს აზერბაიჯანის მთიანი ყარაბაღის ოლქსა და მის მეზობლად მდებარე შაუმიანის რაიონს. 1991 წლის 10 დეკემბერს ჩატარებული რეფერენდუმით, მონაწილეთა უმრავლესობამ მის დამოუკიდებლობას მისცა ხმა.

1992 წლის 6 იანვარს ყარაბაღის პარლამენტის პირველმა მოწვევამ მიიღო დეკლარაცია "მთიანი ყარაბაღის რესპუბლიკის სახელმწიფო დამოუკიდებლობის შესახებ". ამ განცხადებას შედეგად სამხედრო კონფლიქტი მოჰყვა აზერბაიჯანის სამთავრობო ჯარებსა და რეგიონის მოსახლეობის შეიარაღებულ დაჯგუფებებს შორის, რომელთაც მხარს უჭერდა სომხეთის რესპუბლიკა.

კონფლიქტმა მნიშვნელოვნად დაძაბა ურთიერთობა სომხეთსა და აზერბაიჯანს შორის, რადგან ეს უკანასკნელი მთიან ყარაბაღს საკუთარ ტერიტორიად მიიჩნევს. გაეროც ყარაბაღს აზერბაიჯანის ტერიტორიად აღიარებს.