უნდა ისჯებოდეს თუ არა ადამიანი საკუთარი თავისთვის ზიანის მიყენების გამო — ეს იყო ერთ-ერთი კითხვა, რომელიც უზენაესი სასამართლოს მოსამართლეობის კანდიდატს, მერაბ გაბინაშვილს კოალიცია დამოუკიდებელი და გამჭვირვალე მართლმსაჯულებისათვის წარმომადგენელმა გასაუბრებაზე დაუსვა.

"ნარკოტიკების მოხმარების საკითხზე გადავიდეთ. კომპლექსური საკითხია... ექსპერტებმა უნდა თქვან, რა სახის ნარკოტიკი რა მიჩვევას იწვევს, რა ზიანს აყენებს ადამიანს... ყველა ადამიანი ინდივიდუალურია... თუ თქვენ საუბრობთ [მეკითხებით] ჩემს ადამიანურ პოზიციაზე, მე არ დავუჭერ არასოდეს მხარს იმას, რომ ადამიანები დადიოდნენ ქუჩაში და სხვის დასანახად აყენებდნენ საკუთარ თავს ზიანს იმიტომ, რომ ჯანმრთელი ადამიანი სჭირდება ქვეყანას..." — განმარტა მოსამართლეობის კანდიდატმა.

მერაბ გაბინაშვილი თბილისის საქალაქო სასამართლოს უვადო მოსამართლეა. ის ერთ-ერთია იმ მოსამართლეებიდან, რომლებიც პარლამენტში წარდგენილ სადავო სიაში იყო. სწორედ ეს სია გახდა მმართველ პარტიაში განხეთქილების და არასამთავრობოების კრიტიკის მიზეზი. სიაში მყოფი მოსამართლეები ე.წ. კლანის წევრებად მოიაზრებოდნენ.

მერაბ გაბინაშვილი 2013-2017 წლებში იყო იუსტიციის უმაღლესი საბჭოს წევრი. ამავე პერიოდში თბილისის საქალაქო სასამართლოს თავმჯდომარე მამუკა ახვლედიანი თანამდებობიდან გაათავისუფლეს და გამჟღავნდა მოსამართლეთა საგამოცდო ტესტები.

საქართველოს ღია საზოგადოების ფონდის ექსპერტები მიუთითებენ იმაზე, რომ მერაბ გაბინაშვილის იუსტიციის უმაღლესი საბჭოს წევრობის პერიოდში აქტიურად გამოიყენებოდა მოსამართლეთა უკონკურსოდ გადაყვანისა და დაწინაურების მექანიზმი. მოსამართლე გაბინაშვილის იუსტიციის უმაღლესი საბჭოს წევრობის პერიოდში საბჭომ მხარი დაუჭირა ლევან მურუსიძისა (3 წლის ვადით) და მიხეილ ჩინჩალაძის (უვადოდ) თბილისის სააპელაციო სასამართლოს მოსამართლეებად გამწესებას.

ამავე თემაზე: