გამოცემა ბათუმელების მთავარი რედაქტორი, ეთერ თურაძე არ გამორიცხავს, რომ პოლიციელზე თავდასხმის ბრალდებით დაკავებული 5 პირის საქმეზე განხორციელებული ღონისძიებები იყოს მესიჯი გამოცემის (ბათუმელები და ნეტგაზეთი) მიმართ. ბრალდებულები გაზეთ ბათუმელების დამფუძნებლისა და დირექტორის, მზია ამაღლობელის ოჯახის წევრები არიან.

ბათუმელების მთავარი რედაქტორი აცხადებს, რომ თავდაპირველად გამოძიება სისხლის სამართლის კოდექსის 126-ე ძალადობის მუხლით დაიწყო, თუმცა, მოგვიანებით გადაკვალიფიცირდა პოლიციელზე თავდასხმის მუხლით. მისი თქმით, დაკავებულებს ბრალი იმიტომ დაუმძიმდათ, რომ როინ კოჩალიძე გავლენიანი პირია და მას შინაგან საქმეთა მინისტრის მოადგილესთან, ვლადიმერ ბორცვაძესთან არის დაახლოებული.

"ჩვენ საერთოდ არ ვიყავით ამ საქმეში ფიგურანტი პირი, მაგრამ რაც ვნახეთ: როგორ დამძიმდა მუხლი, როგორ დააპატიმრეს ადამიანები, მათ შორის, ერთ-ერთი მათგანი მცირეწლოვანი შვილის თვალწინ, შემდეგ როგორ შევიდნენ ჩვენი გამოცემის დირექტორის, მზია ამაღლობლის სახლში, სადაც თითქოს ერთ-ერთ ბრალდებულს ეძებდნენ, მაგრამ ამ ბრალდებულს რატომღაც თავის სახლში არ მიაკითხეს. გვაქვს კითხვები, ვფიქრობთ, ეს არის მესიჯი ჩვენი გამოცემის მიმართ. გავეცანი ჩვენებებს, სადაც პოლიციელი ამბობს, რომ თავს დაესხნენ. სატელეფონო აუდიო ჩანაწერში კი ისმის, რომ პოლიციელი იგინება და ბრალდებულები, პირიქით, მის დამშვიდებას ცდილობენ. ჩანაწერში მკაფიოდ ისმის, "პატივს ვცემთ პოლიციას", "დამშვიდდიო", "მეგობრები გვყავს პოლიციელება".. ამის საპასუხოდ როინ კოჩალიძეს მათ დედას აგინებს. ვფიქრობთ, რომ თავისი სტატუსიდან გამომდინარე, მას აქვს გავლენები და ის იყენებს ამას", — ამბობს თურაძე.

ამ საქმეზე ბრალდებულებს ბათუმის საქალაქო სასამართლომ აღკვეთის ღონისძიების სახით გირაო შეუფარდა.