2020 წლის საპარლამენტო არჩევნებისთვის ევროპული საქართველო სიის შედგენის ახალ წესზე გადადის. როგორც პარტიაში აცხადებენ, ლიდერები, პარლამენტის წევრები, პარტიის რაიონული ორგანიზაციის ხელმძღვანელები და წევრები თანაბარ კონკურენციაში იქნებიან. გამონაკლისი იქნება პარტიის თავჯდომარე, რომელიც სიის პირველი ნომერია, ახალი სახეები და კოალიციური პარტნიორები.

ევროპული საქართველოს განმარტებით, პარლამენტში მოსახვედრად კანდიდატი ირჩევს კონკრეტულ ტერიტორიულ ერთეულს და ამ ტერიტორიულ ერთეულში მიღებული ხმების შესაბამისად დალაგდება კანდიდატების საბოლოო რეიტინგი. კონკურენცია გაიმართება ორ კომპონენტად:

  • რაიონული ორგანიზაციები;
  • პარტიის მოქმედი თუ ყოფილი დეპუტატები.

პარტიის ლიდერებს შეუძლიათ მონაწილეობა მიიღონ ორივე კონკურენციაში.

"ქართული ოცნების ხელისუფლების პირობებში თითქმის ყველა დემოკრატიული ინსტიტუტი დასუსტდა. ამ პირობებში აუცილებელია ხელისუფლების დემოკრატიული ალტერნატივა არამარტო სიტყვით არამედ საქმითაც წარმოვაჩინოთ. ევროპული საქართველოს საპარლამენტო სიის შედგენის ახალი წესი სწორედ ალტერნატივაა ერთპიროვნული, ჩაკეტილი და ხალხის ნებისგან მოწყვეტილი პოლიტიკური პროცესის შესაცვლელად", — ნათქვამია პარტიის განცხადებაში.

მათივე თქმით, აღნიშნული წესის მიზანია სიის შედგენისას მაქსიმალურად გამოირიცხოს ერთპიროვნული გადაწყვეტილებების მიღების შესაძლებლობა და მთავარი კრიტერიუმი კონკრეტული ადამიანების მიმართ ამომრჩევლის ნდობა იყოს.

ევროპული საქართველო შეეცდება შესაბამისი ცვლილებები საარჩევნო კოდექსში შევიდეს, თუმცა უარის შემთხვევაში შიდა პარტიული რეგულაციით აამოქმედებს ამ წესს.