#სირცხვილიას წევრები საპროტესტო აქციებს რეგიონებშიც გეგმავენ. ამის შესახებ დღეს, აქციის ერთ-ერთმა ორგანიზატორმა გიგა მაქარაშვილმა ზუგდიდში განაცხადა, სადაც მერიის წინ მხარდამჭერებთან ერთად გაავრცელა მიმართვა.

"ჩვენ გადავწყვიტეთ, მივიღოთ ბიძინა ივანიშვილის გამოწვევა, გამოწვევა იმისა, რომ მას თუ არ აინტერესებს ჩვენი პროტესტი, ჩვენი ხმა, ჩვენი აზრი, ჩვენ ვიქნებით მის წინააღმდეგ რადიკალურები", — თქვა მაქარაშვილმა. მან ასევე აღნიშნა, რომ დღეიდან, 14 სექტემბრიდან სხვადასხვა ქალაქში მათი მხარდამჭერები "ერთ დიდ მოძრაობაში" ჩაერთვებიან. პირველი აქცია ზუგდიდში იმართება და გაგრძელება ბათუმში, ლანჩხუთში, სამტრედიაში, ქუთაისსა და გორში. მისივე თქმით, ეს #სირცხვილიას მოძრაობის გაგრძელება იქნება.

"ჩვენ ბევრი ფლანგიდან შევუტევთ რეჟიმს, რომელმაც დაგვაბრმავა, დაგვასახიჩრა, მოგვწამლა და 2020 წელს აუცილებლად დავამარცხებთ არჩევნების გზით", — თქვა გიგა მაქარაშვილმა.

შენიშვნა: გიგა მაქარაშვილმა პირდაპირ ეთერში განაცხადა, რომ "ერთ დიდ მოძრაობაში" გააერთიანებდნენ მხარდამჭერებს რეგიონებიდან, რაც მოგვიანებით განმარტეს, რომ ეს არა საზოგადოებრივი მოძრაობის დაფუძნებას, არამედ ბრძოლის გაგრძელებას ნიშნავდა.

ამავე თემაზე: