საქართველოს პარლამენტის შენობაში, სადაც ნაციონალური მოძრაობის ფრაქციის სხდომაზე გიორგი გახარიას მომავალ მინისტრთა კაბინეტის მოსმენა უნდა გაიმართოს, მოქალაქეებს არ უშვებენ. სამოქალაქო აქტივისტები ამ წუთებში პარლამენტის შესასვლელთან არიან და გიორგი გახარის გაპრემიერებას აპროტესტებენ.

როგორც ადგილიდან On.ge-ს ჟურნალისტი იუწყება, საშვის მქონე მოქალაქეებს პარლამენტის შენობაში შესვლაზე უარს იმ მოტივით ეუბნებიან, რომ "პროგრამული ხარვეზია". უწყების პრესსამსახურში კი განმარტავენ, რომ შენობაში უშვებენ, მხოლოდ ჟურნალისტებსა და პარლამენტის თანამშრომლებს.

აქტივისტები პარლამენტში არ შეუშვეს 3 სექტემბერსაც.

პარლამენტთან შეკრებილი აქციის მონაწილეები გიორგი გახარიას კანდიდატურის პრემიერ-მინისტრად წარდგენას აპროტესტებენ. #სირცხვილიას ორგანიზატორები 76 დღეა მის გადადგომას ითხოვენ. აქციის მონაწილეების თქმით, გახარიას პრემიერად წარდგენა საზოგადოების შეურაცხყოფაა. პარლამენტში "უსაფრთხოების უზრუნველყოფის მოტივით" დეპუტატებსა და ჟურნალისტებს არ უშვებდნენ 20 ივნისსაც. მათ შორის იყო On.ge-ს ჟურნალისტიც, რომელსაც პარლამენტის აკრედიტაცია ჰქონდა. პრესსამსახური მაშინ განმარტავდა, რომ მიზეზი "გამკაცრებული უსაფრთხოების" ნორმები იყო.