გომი-საჩხერის გზაზე ეკლესიის ფორმის რკინის კონსტრუქციაზე ილია ჭავჭავაძის გამონათქვამთან ერთად, კათოლიკოს პატრიარქის, ილია მეორის სიტყვებიცაა დატანილი. ამის შესახებ რადიო თავისუფლება წერს. ამავე გამოცემას მიაწოდა შესაბამისი ფოტომასალა დიზაინერმა ქეთევან საქარელმა.

კონსტრუქციის ერთ მხარეს აწერია ილია ჭავჭავაძის სამი საუნჯე (არასწორი თანმიმდევრობით): "ენა, მამული, სარწმუნოება". ხოლო, ამავე კონსტრუქციის მეორე მხარეს ამოიკითხავთ მართლმადიდებლური ეკლესიის კათოლიკოს-პატრიარქის, ილია მეორის სიტყვებს: "ღმერთი, სამშობლო, ადამიანი".

ილია მეორემ სიონის ტაძარში ქადაგებისას მარიამობის დღესასწაულთან დაკავშირებით განაცხადა, რომ თავის დროზე ილია ჭავჭავაძემ თქვა: "მამული, ენა, სარწმუნოება" და მათ დაუმატეს: "ღმერთი, სამშობლო და ადამიანი":

"დიდება და მადლობა უფალს, რომ ღმერთმა დაგვაჯილდოვა ჩვენ ამისი გრძნობით, შეგრძნებით, რომ პირველია ღმერთი, მეორეა სამშობლო და მესამეა ადამიანი".