ფორმულა კრეატივის არხზე ჩემი ცოლის დაქალებთან ერთად კიდევ ერთი ახალი სერიალი გავა. ამის შესახებ On.ge-ს ჩცდ-ს პროდიუსერმა და ფორმულა კრეატივის თანადამფუძნებელმა, ირაკლი საღინაძემ უთხრა.

მისი ინფორმაციით, ახალი სერიალი სოციალური დრამა იქნება. მას, სავარაუდოდ, თესეა ერქმევა და ეთერში ნოემბრის დასაწყისში გავა. საღინაძე ამბობს, რომ სერიალი ადამიანების ცხოვრებაზე იქნება და შეეხება ყველა საკითხს, რაც მოსახლეობას აწუხებს.

"ყველასთვის საყვარელი სერიალი გახდება", — ამბობს საღინაძე.

მისივე თქმით, სერიალზე მუშაობა უკვე დაწყებულია და გადაღებები მთელი საქართველოს მასშტაბით იქნება. სერიალში მინიმუმ 24 სერია იქნება, მათგან 10 კი უკვე გაწერილია. ფორმულა კრეატივი სერიალს აშშ-ს საელჩოს დაფინანსებით გადაიღებს.

ფორმულა კრეატივის ტელევიზიამ მაუწყებლობის უფლება დღეს, 29 აგვისტოს მიიღო. კრეატივმა არხის გახსნის შესახებ ინფორმაცია რამდენიმე კვირის წინ დაადასტურა. ასევე, ცნობილი გახდა, რომ არხი თავდაცვის ყოფილ მინისტრთან, დავით კეზერაშვილთან პარტნიორობით იქმნება.