ჰონგ-კონგის პოლიციის ოფიცერმა აქციის დაშლის დროს ცეცხლსასროლი იარაღიდან გაისროლა. ამასთანავე, გავრცელებულ ფოტოებსა და ვიდეოებში ჩანს, რომ სხვა სამართალდამცავებსაც უჭირავთ იარაღი. ივნისში აქციების დაწყებიდან ეს პირველი შემთხვევაა, როდესაც პოლიცია დემონსტრანტების წინააღმდეგ იარაღს იყენებს.

კვირას აქციის დაშლისას თავდაპირველად პოლიციამ წყლის ჭავლი, ცრემლსადენი გაზი და რეზინის ტყვიები გამოიყენა. ჯამში 36 ადამიანი დააკავეს, მათგან ყველაზე პატარა 12 წლისაა.

პოლიციამ შემდგომში განმარტა, რომ იარაღი ექვსმა სამართალდამცავმა ამოიღო და აქედან ერთმა გამაფრთხილებელი გასროლა განახორციელა.

ფოტო: Apple Daily

უკვე ორ თვეზე მეტია, სადავო საექსტრადაციო კანონის გამო დაწყებული დემონსტრაციები აღარ წყდება. ახალი კანონის თანახმად, დაკავებულ პირს განაჩენს ჩინეთის სასამართლო გამოუტანს, რასაც ჰონგ კონგელების დიდი ნაწილი არ ეთანხმება.

ჰონგ-კონგს დიდი ბრიტანეთის კოლონიის სტატუსი 1997 წელს ჩამოერთვა და ჩინეთის შემადგენლობაში იმ პირობით შევიდა, რომ ფართო ავტონომია ექნებოდა, გარდა თავდაცვითი და საგარეო საკითხებისა, ის დამოუკიდებლად მიიღებდა გადაწყვეტილებებს.

მაშინდელი ლიდერები საზოგადოებას დაჰპირდნენ, რომ ჰონგ-კონგი, მაკაო და შეერთების შემთხვევაში ტაივანი, შეინარჩუნებდა პრინციპს — ერთი ქვეყანა, ორი სისტემა.