რუსთავი 2-ის მფლობელი, ქიბარ ხალვაში კურიერის განახლებას სექტემბრიდან გეგმავს. როგორც მან იმედთან სატელეფონო საუბრისას თქვა, მას არხის განვითარების მყარი გეგმა აქვს.

"ჩვენ ვფიქრობთ ახალ კადრებზეც და ძველებზეც. ჩვენ ვიქნებით ობიექტური, კრიტიკული ტელევიზია და ძველი კადრებისთვის სამუშაო არის. არ ექნებოდათ არანაირი შეხება. ვფიქრობ, რომ შანტაჟისა და ბულინგის მსხვერპლი გახდნენ. თუ მობრუნდებიან, ვიქნებით ბედნიერები, თუ არა და ახალს მოვძებნით", — აღნიშნა ხალვაშმა.

რუსთავი 2-დან ჟურნალისტების წასვლის შემდეგ ხალვაშმა განცხადებაც გაავრცელა. მისი თქმით, ჟურნალისტების ნაწილმა ემოციური გადაწყვეტილება მიიღო და პოზიტიურ ცვლილებებს უახლოეს დღეებში გაგვაცნობს. როგორც მან განცხადებაში აღნიშნა, არხზე განვითარებული მოვლენები იმის მტკიცებულებაა, რომ ექს-პრეზიდენტი, მიხეილ სააკაშვილი და ნიკა გვარამია კომპანიას ანგრევდნენ.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა, მეორე დღეს კი თითქმის სრული შემადგენლობით ჟურნალისტებმა. რუსთავი 2 დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვა P.S.-ის გუნდმა და რეგიონის ჟურნალისტებმა. უკვე ორი დღეა ეთერში არ გასულა კურიერი.