საქართველოს პრეზიდენტის, სალომე ზურაბიშვილის მრჩევლად თავდაცვისა და უშიშროების საკითხებში საბჭოთა კა-გე-ბე-ს (სსრკ-ის სახელმწიფო უშიშროების კომიტეტი) ოფიცერი, დიმიტრი ლეჟავა დაინიშა. ამის შესახებ თავდაპირველად რუსთავი 2-მა დაწერა. ლეჟავას დანიშვნის შესახებ ინფორმაცია კი On.ge-ს პრეზიდენტის ადმინისტრაციაში დაუდასტურეს.

კითხვაზე, რატომ შეირჩა ის ამ თანამდებობაზე, ადმინისტრაციაში ამბობენ, რომ ამასთან დაკავშირებით განცხადებას მოგვიანებით გაავრცელებენ.

დიმიტრი ლეჟავა 1983-1994 წლებში მუშაობდა საქართველოს სახელმწიფო უშიშროების ორგანოებში, 1994-1996 წლებში სახელმწიფო დაცვის სპეცსამსახურში, 1996-1998 წლებში ეროვნული უშიშროების საბჭოს აპარატში, მოგვიანებით კი საქართველოს თავდაცვის სამინისტროს კადრების მთავარი სამმართველოს უფროსი იყო.

თავდაცვისა და უსაფრთხოების საკითხებში სამოქალაქო საბჭოს გამგეობის წევრი, თეონა აქუბარდია ამბობს, რომ უსაფრთხოების სპეციალისტების მიმართულებით საქართველოში დასავლური განათლების მქონე კადრების სიმცირე არ არის. მისივე განცხადებით, ლეჟავას საბჭოთა უშიშროების სამსახურში მიღებული გამოცდილება უარყოფითი მოვლენაა.

"კითხვის ნიშნები არსებობს, როდესაც საბჭოთა უშიშროების სამსახურიდან მოგყავს მრჩეველი, რა დივიდენდები მოჰყვება ამ მრჩეველს პრეზიდენტისთვის, მით უფრო, რომ წესით, ის უნდა იყოს პრეზიდენტის წარმომადგენელი ეროვნული უსაფრთხოების საბჭოში", — უთხრა აქუბარდიამ რუსთავი 2-ს.